شەڕ لەنێوان هەسەدە و هێزەکانی حکومەتی سوریا دەستیپێکردەوە

ئاژانسی هەواڵی عیراقی

رێگەی نێوان رەقە و دێرەزور

ئەمڕۆ 17ی 1ی 2026 لە ناوچەکانی دیبسی عەفنان  و کێڵگەی سەورە و رەسافە لەڕۆژئاوای رەقە، شەڕ لە نێوان هێزەکانی حکومەتی سوریا و هێزەکانی سوریای دیموکرات (هەسەدە) روویدا، کەهاوکاتە لەگەڵ کشانەوەی هێزەکانی هەسەدە لەهەندێک ناوچەی رۆژئاوای حەلەب، ئەمەش بەپێشێلکردنی ئەو لێکتێگەیشتنە دادەنرێت کە لەنێوان هەردوولادا راگەیەندرابوو.

روانگەی سوریی بۆ مافەکانی مرۆڤ بە پشتبەستن بە سەرچاوە مەیدانییەکان بڵاویکردەوە: هێزەکانی پاراستنی ژنان (یەپەژە) بەرپەرچی هێرشی هێزەکانی سەر بە حکومەتی سوریای داوەتەوە و کوژراو و برینداری لێکەوتووەتەوە.

هاوکات دەستەی کاروباری ناوخۆیی ئەنجومەنی جێبەجێکاری پارێزگای رەقە لەبەر بەرژەوەندی گشتی و پاراستنی گیانی هاووڵاتیانی مەدەنی، ئەمڕۆ قەدەغەی هاتووچۆی تەواوەتی لە تەواوی پارێزگاکە راگەیاند.

ئەمەش لەکاتێکدایە، هەر ئەمڕۆ هێزەکانی سوریای دیموکرات رایگەیاند: دیمەشق مەرجەکانی رێککەوتنی کشانەوەی لە شارۆچکەکانی دێرحافر و مەسکەنە پێشێل کردووە، هەربۆیە داوا لە وڵاتە نێودەوڵەتییەکان دەکەین کە بەشداربوون لە رێککەوتنەکە پەلەبکەن و دەسوەردان بکەن.

PUKMEDIA