بەڕێوەبەری خۆراک: کێشەی راگرتنی بەشەخۆراکی هاووڵاتیان چارەسەرکرا

PUKMEDIA

بەشەخۆراکی مانگانە

گرفتی نێوان وەزارەتی بازرگانی هەرێم و وەزارەتی بازرگانی عیراق سەبارەت بەڕاگرتنی بەشەخۆراکی هاووڵاتیان چارەسەرکرا، بەڕێوەبەری خۆراکی سلێمانیش دەڵێت: لەچەند رۆژی داهاتوودا دەست بەدابەشکردنی بەشەخۆراکی هاووڵاتیان دەکەینەوە.

کامەران فەتاح بەڕێوەبەری خۆراکی سلێمانی بەوێبسایتی رەسمیی یەکێتیی نیشتمانیی کوردستان PUKMEDIA ی راگەیاند: کەمێک پێش ئێستا بەغدادەوە پەیوەندیمان پێوەکرا، کە دەستبکەین بە دابەشکردنی بەشەخۆراکی مانگی هەشت بە گۆڕانکاریی مانگی 12 و لەچەند رۆژی داهاتوودا دەستپێدەکەین.

راشیگەیاند: دەتوانین بڵێین گرفتی نێوان وەزارەتی بازرگانی هەرێم و وەزارەتی بازرگانی عیراق چارەسەرکراوە کە هۆکاری راگرتنی بەشەخۆراکی هاووڵاتیان بوو، هەربۆیە بە زووترین کات دەستدەکەین بە دابەشکردنی بەشەخۆراکی مانگی هەشتی ساڵی رابردوو.

بەڕێوەبەری خۆراکی سلێمانی ئاماژەی بەوەشکرد: دابەشکردنەکە دەکەوێتە ناوەڕاست یان کۆتایی هەفتەی داهاتوو، بەوپێیەی دوو بۆ سێ رۆژمان پێویستە تا پارە و خۆراکەکان دەگات.

ئەمەش لەکاتێکدایە، بەپێی زانیارییەکانی PUKMEDIA بەهۆی ئەوەی هەرێم پارەی بەشەخۆراکی هاووڵاتیانی لەساڵی 2003وە تا ساڵی 2022 بۆ بەغداد نەناردبوو، کە بڕەکەی زیاتر لە 117 ملیار دینارە، بەغداد بەشەخۆراکی هەرێمی راگرت.

هاوکات، بەشەخۆراکی مانگانەی هاووڵاتیان کە خۆی لە (ئارد، برنج، زەیت، نیسک، فاسۆلیا، نۆک، لەتکە نۆک، دۆشاو، شەکر) دەبینێتەوە، مانگانە بەسەر هاووڵاتیاندا دابەشدەکرێت، بەڵام بە تێکڕای ساڵەکە چەند مانگێک دابەشناکرێت و ئەمەش کاریگەری لەسەر جێگیرکردنی نرخی خۆراک لەبازاڕەکاندا هەیە و بەدابەشنەکردنی بەشەخۆراک نرخەکان لەبازاڕدا بەرز دەبنەوە.

PUKMEDIA