هێزەکانی ئاسایشی ناوخۆ: لەحەلەب شەڕ بەردەوامە

المرصد السوري لحقوق الانسان

نەخۆشخانەی شەهید خالد فەجر

هێزەکانی ئاسایشی ناوخۆی حەلەب لە بەیاننامەیەکدا، بانگەشەکانی وەزارەتی بەرگری حکومەتی کاتی سوریای رەتکردەوە، کە باس لە وەستانی هێرشەکان لەسەر گەڕەکی شێخ مەقسوود و بوونی هێزەکانیان لە ناو نەخۆشخانەی شەهید خالد فەجر دەکەن.

لەبەیاننامەیەکدا، هێزەکانی ئاسایشی ناوخۆی حەلەب لە شێخ مەقسوود سەرجەم ئەو بانگەشانەی رەتکردەوە، کە باس لەوەستانی هێرشەکان بۆسەر گەڕەکی شێخ مەقسود دەکەن و رایگەیاند: ئەو بانگەشانە هیچ بنەمایەکی راستییان نییە.

راشیگەیاندووە: هێرشە بۆردومانییەکان بۆ تۆپ و درۆن تا ئەم ساتە بەردەوامن، بەجۆرێک نەخۆشخانەکە بریندارانی ژن و منداڵان و بەساڵاچووانی تیدایە و هیچ نیشانەیەکی سەربازیشییان پێوە دیارنییە.

هاوکات، هێزەکانی ئاسایش داوایان رێکخراوەکانی مافی ‌مرۆڤ کردووە سەردانی نەخۆشخانەکە بکەن و بە شێوەی مەیدانی راستییەکان ببینن، هەروەها هۆشداریشیدا، کە دروستکردنی ئەم بانگەشانە بۆ ئەنجامدانی تاوان لە دژی هاوڵاتییان و بەئامانجگرتنی نەخۆشخانەکە.

لەبەرامبەریشدا، ئەنجومەنی ئۆپەراسیۆنەکانی سوپای عەرەبی سوریا ئەمڕۆ شەممە 10ی1ی2026، رایگەیاند: سەرجەم ئۆپراسیۆنە سەربازییەکان لەناو گەڕەکی شێخ مەقسوود لەسەعات 1:00ی دوانیوەڕۆوە رادەوەستێت و ئەو چەکدارە کوردانەی کە لەناو نەخۆشخانەی یاسین بوون چەکەکانیان لێدەسێندرێت و دەگوێزرێنەوە شاری تەبەقە.

ئەمەش لەکاتێکدایە، رۆژی 6ی1ی2026، چەکدارەکانی سەر بە حکومەتی سووریا جارێکی دیکە بەشی باکووری گەڕەکی شێخ مەقسود و بەنی زەیدی سەر بە پارێزگای حەلەبیان تۆپباران کرد کە لەژێر دەستی کورددایە و هاوکات چەند ناوچەیەکی تریشی تۆپباران کرد و بەهۆیەوە چەندین کەس شەهید و برینداربوون و تا ئیستاش شەڕ بەردەوامی هەیە.

PUKMEDIA