ئەنجومەنی باڵای ئیسلامی عەلەوی سەرکوتکارییەکانی حەلەب شەرمەزار دەکات

أسوشيتد برس

سوریا

ئەنجومەنی باڵای ئیسلامی عەلەوی لە سوریا و هەندەران، بە توندی ئەو کردەوانە شەرمەزار دەکات، کە لە هەردوو گەڕەکی شێخ مەقسوود و ئەشرەفییە لە حەلەب لەلایەن دەسەڵاتدارانی دیمەشقەوە ئەنجام دەدرێن.

ئەنجومەنەکە هۆشداری دەدات، کە بەردەوامبوونی ئەم سیاسەتە سەرکوتکارییانە دەبێتە هۆی داڕمانی یەکجاریی کۆمەڵگەی سوریا، هاوکات ئەنجومەنى ناوبراو بەرپرسیارێتی دەخاتە ئەستۆی هەموو ئەو لایەنانەی، کە سوورن لەسەر بەڕێوەبردنی وڵات بە لۆژیکی توندوتیژی و پەراوێزخستن، لەبری پەنابردن بۆ یاسا و دامەزراوەکان.

ئەنجومەنی باڵای ئیسلامی عەلەوی لە سوریا و هەندەران، داواش دەکات دەستبەجێ دەستگیرکردنەکان و کوشتنی مەیدانی رابگیرێن، دیمەنە چەکدارییەکان لە گەڕەکە مەدەنییەکان بکشێنرێنەوە و بڕیارە نێودەوڵەتییە پەیوەندیدارەکان جێبەجێ بکرێن و داوا لە کۆمەڵگەی نێودەوڵەتیش دەکات، کە بەرپرسیارێتییەکانی خۆی هەڵبگرێت و لە ئاست ئەوەی روودەدات بێدەنگ نەبێت.

ئاماژەبەوەش دەدەن: رزگارکردنی سوریا بە سەرکوتکردن نابێت، بەڵکوو لە رێگەی سەروەری یاسا، پاراستنی مەدەنییەکان و دەستوورێکی سیاسی دیموکراسی نامەرکەزی تەوافوقی دەبێت کە مافی هەموو سورییەکان مسۆگەر بکات.

PUKMEDIA