عیماد ئەحمەد:کورد چەند یەکڕیزبێت هێزى زیاترە لە بەغداد

PUKMEDIA

عیماد ئەحمەد لێپرسراوى مەکتەبى راگەیاندن و هۆشیارى یەکێتیى نیشتمانیى کوردستان

عیماد ئەحمەد لێپرسراوى مەکتەبى راگەیاندن و هۆشیارى یەکێتى رایگەیاند: دەمانەوێت گەلى کورد لە چوارچێوەى عیراقى نوێى دیموکراتدا بە پێى دەستور نەتەوەى کورد بە مافە رەواکانى شاد ببێت و یەکێتى دەیەوێت خزمەت بە سەرجەم کۆمەڵانى خەڵکى کوردستان لە سەرجەم ناوچەکان بکرێت، هاوکات هەموو شتێک بۆ بەدەستهێنانى پۆست ناکاتە قوربانى و شەڕیش ناکات.

عیماد ئەحمەد لێپرسراوى مەکتەبى راگەیاندن و هۆشیارى یەکێتیى نیشتمانیى کوردستان، لە کۆنگرەیەکى رۆژنامەوانیدا بە بۆنەى رۆژى ئاڵاوە پیرۆزبایى لە کۆمەڵانى خەڵکى کوردستان کرد و رایگەیاند: دەبێت ئەم رۆژە بکەین بە رۆژى یەکهەڵوێستى و یەکدەنگى و خزمەتى کۆمەڵانى خەڵکى کوردستان و رۆژى ئەوەى کە هەر کێشەیەک لە هەرێمى کوردستاندا هەیە چارەسەری بکەین و بیکەینە رۆژى زاخاوى خەباتى خۆمان لە پێناوى مافى رەواى گەلەکەمان و لە چوارچێوەى عیراقى دیموکراتدا و دەستووردا ئێمە لە بەشى باشوورى کوردستان بە مافى خۆمان شادبین.

ئەوەشیخستەڕوو: یەکێتیى نیشتمانیى کوردستان سورە لەسەر رێبازەکەى خۆى کە رێبازى بەیەکەوە ژیانە و لەسەر پۆست شەڕناکەین و هەموو شتێێک بۆ بەدەستهێنانى پۆست ناکەینە قوربانى و ئەوەمان لا گرنگە کە ئەم هەرێمە زیاتر لەگەڵ بەغداد لە ئاشتیدا بێت، دەمانەوێت شتێک بکەین لە خزمەتى میللەتەکەماندا بێت.

ئاماژەیبەوەشدا: کورد چەند یەکڕیز و یەک هەڵوێست بێت هێزى زیاترە لە بەغداد و هەر لەسەردەمى رەوانشاد سەرۆک مام جەلالەوە گرنگییەکى زۆرمان بە بوونى کورد لە بەغداد داوە، چونکە لە رێى پەیوەندییەکى باش لەگەڵ بەغداد دەتوانین زۆر کێشە چارەسەر بکەین و زۆر دەستکەوتیش بۆ میللەتەکەمان مسۆگەر بکەین.

باسیلەوەشکرد: یەکێتى هێزێکى باڵایە لە کوردستان و خاوەن مێژووە و خاوەنى شەهیدێکى زۆرە و مافى کۆمەڵانى خەڵک و خزمەتکردنى کۆمەڵانى خەڵکمان لا گرنگە، کە سەرجەم کۆمەڵانى خەڵکى کوردستان لە تەواوى ناوچە جیاوازەکانى کوردستان وەکو یەک خزمەتبکرێن.

عیماد ئەحمەد ، راشیگەیاند: هیچ پەرتەوازەییەک خزمەتى میلەتەکەمان ناکات و دڵى دۆستەکانیشمان خۆشناکات، بەڵکو دڵى دوژمنەکانمان خۆش دەکات.

PUKMEDIA