عەتا محەمەد: قۆناغ بە قۆناغ ژیان لە چەمچەماڵ ئاسایى دەکرێتەوە

نوسینگەى راگەیاندنى قوباد تاڵەبانى

وێنەى کۆبوونەوەیەک لە چەمچەماڵ

رەوشى زیانلێکەوتوانى قەزاى چەمچەماڵ و شارەکە بە گشتى قۆناغ بە قۆناغ ئاسایى دەکرێتەوە و لێپرسراوى نوسینگەى جێگرى سەرۆکى حکومەتیش دەڵێت: بارودۆخەکە لە چەمچەماڵ ئاسایى بووەتەوە، دابەشکردنى خۆراک و پێداویستى تەندروستى و کەلوپەلى ناوماڵ بەسەر زیانلێکەوتوواندا بەردەوامى هەیە.

عەتا محەمەد لێپرسراوى نوسینگەى قوباد تاڵەبانى جێگرى سەرۆکوەزیرانى حکومەتى هەرێم، روونیکردەوە: لە هەوڵەکانمان بەردەوامین بۆ ئاسایى کردنەوەى ژیان لە قەزاى چەمچەماڵ و تیمەکانى پاکردنەوە و دابەشکردنى پێداویستى بە بەردەوامى لە کاردان و قۆناغ بە قۆناغ ژیان لە قەزاى چەمچەماڵ ئاسایى دەبێتەوە.

راشیگەیاند: لە ئێستادا لە چەمچەماڵ پێدانى ئاو و کارەبا ئاسایى بوەتەوە و هاوکات رێکخراوەکانیش وردە وردە لە رێگەى تیمەکانمانەوە هاوکارییەکان دەگەیەننە زیانلێکەوتوان ئەمە جگە لەوەى لیژنەیەکمان بۆ چاککردنەوەى رێگاکانى گوندەکانى سنورەکە پێکهێناوە و لە هەوڵى کردنەوەى ئەو رێگایانەن کە بەهۆى لافاوەکە داخراون.

سەبارەت بە بارودۆخى ئەمنیش لە قەزاکە لێپرسراوى نوسینگەى قوباد تاڵەبانى، رایگەیاند: لەگەڵ ئەوەى دوێنێ چەند چەکدارێک هێرشیان کردە سەر هێزە ئەمنییەکان و بەداخەوە سێ کارمەند بریندار بوون، کە تەندروستى کارمەندێکیان ناجێگیرە، بەڵام تەقەکەرەکان دەستگیرکراون و رووبەڕووى یاسا کراونەتەوە و هاوکات لە  ئێستادا بارودۆخى ئەمنى قەزاکە زۆرباشە و خۆمان و تیمەکانمان بە بەردەوامى لەگەڵ خەڵکى لێقەماى چەمچەماڵدا دەمێنینەوە تا ئەو کاتەى بارودۆخەکە بەتەواوى ئاسایى دەبێتەوە.

هەر لەو بارەیەوە شاهۆ عوسمان جێگرى پارێزگارى سلێمانى بە PUKMEDIA  راگەیاند:هەموو ئامادەکارییەکمان بۆ دووبارە نەبوونەوەى ئەو رووداوە نەخوازراوەى لە چەند رۆژى رابردوودا لە قەزاى چەمچەماڵ روویدا کردووە، کە زیانى ماددى و گیانى لێکەوتەوە، هاوکات لیژنەیەکیش پێکهێنراوە بۆ لێکۆڵینەوە لە رووداوەکە و کەمتەرخەمان سزا دەدرێن، چونکە قوباد تاڵەبانى جێگرى سەرۆکى ئەنجومەنى وەزیران، زۆر جدییە لەسەر ئەو بارودۆخەى لە چەمچەماڵ روویداوە و تەئکید دەکاتەوە، کە پێویستە کەمتەرخەمان سزا بدرێن.

راشیگەیاند: دەستى هاوکارى لە هەمو لایەکەوە گەیشتووەتە چەمچەماڵ و سەرجەم فەرمانگە خزمەتگوزارییەکانى پارێزگاى سلێمانیمان خستوەتە خزمەت چەمچەماڵ و وەک یەک تیم لەگەڵ خۆبەخشەکان و هێزە ئەمنییەکان بۆ ئاسایى کردنەوەى بارودۆخەکە لە چەمچەماڵ کاردەکەین.

راشیگەیاند: هەرچەندە کارەساتەکە سروشتى بووە، بەڵام کەمتەرخەمى هەبووە و بێگومان ئەنجامى لێکۆڵینەوە لەو کارەساتە دەدەینە قوباد تاڵەبانى،  بۆئەوەى کەمتەرخەمان رووبەڕووى یاسا بکرێنەوە و سزا بدرێن، هاوکات لە ئێستادا لە چەمچەماڵین بۆ ئەوەى رێگاى گوندەکانى سنورەکەش بکەینەوە و ژیان لە قەزاکە ئاسایى بکەینەوە.

ئەمەش لەکاتێکدایە رۆژى سێشەممە 9ى12ى2025 لافاو لە قەزاى چەمچەماڵ روویدا و زیانێکى زۆرى ماددى و گیانى لێکەوتەوە و بەهۆیەوە سەدان ماڵ ئاو چووە ناو ماڵەکانیان.

PUKMEDIA