قوباد تاڵەبانی: کلیلی چارەسەری کێشەکانی هەرێم و بەغداد دەستوورە

راگەیاندنی قوباد تاڵەبانی

قوباد تاڵەبانی و عەمار حەکیم

وەفدی باڵای یەکێتیی نیشتمانیی کوردستان بە سەرۆکایەتیی قوباد تاڵەبانی لە بەغداد لەگەڵ عەمار حەکیم، سەرۆکی رەوتی حیکمە کۆبووەوە.

لە کۆبوونەوەکەدا کە رۆژی دووشەمە(8/12/2025) بەڕێوەچوو، ئاڵوگۆڕی بیروڕاکرا لەبارەی هەنگاوەکانی پێکهێنانی حکومەتی داهاتووی عیراق. هەردوولا هاوڕابوون پێویستە هەموو لایەنە عیراقییەکان لە پێکهاتە جیاوازەکان پێکەوە کار بکەن بۆ پێکهێنانی حکومەت لەسەر بنەمای دەرەنجامەکانی هەڵبژاردن و بە لەبەرچاوگرتنی بەرژەوەندییە باڵاکانی عیراق، بە جۆرێک کە جێی رەزامەندیی هەموو پێکهاتەکانی عیراق بێت.

قوباد تاڵەبانی ئاماژەی بەوەدا کە یەکێتی پێیوایە چارەسەری زۆربەی کێشەکانی عیراق، لەناویشیاندا کێشەکانی نێوان هەرێم و بەغداد لە پابەندبوون بە دەستوور و جێبەجێکردنی هەموو مادەکانی دەستووردایە.

جەختیشی کردەوە لەسەر پێویستیی رێککەوتنێکی تۆکمەی نێوان لایەنە عیراقییەکان، بە جۆرێک کە لە ئەگەری جێبەجێنەکردنیدا، لەسەر بنەمای ئەو رێککەوتنە لێپرسینەوە لە حکومەتی داهاتوو بکرێت.

PUKMEDIA