سەبارەت بە بڕیارێکى بڵاوکراوە لە وەقایع سودانى داواى لێکۆڵینەوە دەکات

PUKMEDIA

وێنەیەکى رۆژنامەى رەسمى وەقایعی عیراقی

بڕیارێکی لیژنەی سڕکردن و نەهێشتنی سەرچاوە داراییەکانی رێکخراوە تیرۆرستییەکان ـ ی سەر بە ئەمینداریەتی گشتی ئەنجومەنی وەزیرانی عیراق کە لە رۆژنامەى "وەقایعی عیراقی" بڵاوکرایەوە، کاردانەوەی زۆری بەدوای خۆیدا هێنا و نیگەرانی ناوخۆیی لێکەوتەوە، بۆ کەمکردنەوەی کاردانەوەکانیش سەرۆکوەزیران فەرمانی کرد، لێکۆڵینەوەی بەپەلە لەبارەی ئەو بابەتە بکرێت، لە هەمانكاتدا لیژنەی ناوبراو روونکردنەوەیکى بڵاوکردەوە، محەمەد شیاع سودانی ـ یش داوایکرد كەسانی كەمتەرخەم لەو بڕیارە دیاری بكرێن و سزا بدرێن.

لە راگەیەندراوێکی فەرمانگەی راگەیاندنی سەرۆکوەزیران  کە وێنەیەكی بە PUKMEDIA گەیشتووە، هاتووە: محەمەد شیاع سودانی سەرۆکوەزیرانی عیراق لەو بڕیار و كەمتەرخەمیە نیگەرانە و داوای كردووە لێکۆڵینەوەیەکی بەپەلە  بكرێت، بۆ دیاریکردنی بەرپرسیارێتی و لێپرسینەوە لەو کەسانەی کە بەرپرسیارن لە هەڵەی بڕیاری ژمارە (61ی ساڵی 2025)ی لیژنەی سڕكردن و بلۆككردنی سەرچاوە داراییەكانی تیرۆریستان، کە لە "وەقایعی عیراقی" ، ژمارەی (4848) بڵاوکراوەتەوە، كە پێچەوانەی بڕیارەكانی پێشتری عیراقە كە لە لەسەر داوای مالیزیا بڕیاربوو، سەرچاوەی دارایی ئەو لایەنانە بلۆك بكرێن، كە پەیوەندییان بە هەردوو رێكخراوی داعش و قاعیدەوە هەیە.

لە بەیاننامەکەدا ئەوەش هاتووە: هەڵوێستە سیاسی و مرۆییەكانمان پەیوەست بە دەستدرێژی بۆ سەر گەلەكەمان لە لوبنان یان لە فەلەستین هەڵوێستگەلی ئاكارییە و شایان بە موزایەدە نییە، هەروەك هەڵوێستەكانمان رەنگدانەوەی ئیرادەی گەلانی عیراقە بە باوەڕبوون بەوەی براكانمان شایانی ئازادی و ژیانێكی شایستەن لەسەر خاكی خۆیان و هیچ كەسێك لە هەلپەرستان و مایەپوچان ناتوانن موزایەدە بە هەڵوێستەكانی حكومەتی عیراقەوە بكەن كە هەمیشە لە پشت خەبات و قوربانیدانیان وەستاوە.

ئەمەش لە کاتێکدایە، ئەمڕۆ پێنجشەممە 4ى12ى2025، لە ژمارە 4848 ى رۆژنامەى رەسمى  "وەقایعی عیراقی"بڕیارێکى نوێ لە لایەن وەزارەتی دادی عیراقەوە بڵاوکرایەوە، کە بڕیارە نوێیەکانی لیژنەی سڕکردنی سامانی تیرۆریستان لە نووسینگەی ئەمینداریەتی گشتیی ئەنجومەنی وەزیران پشتڕاست کراونەتەوە و بڵاویکردووەتەوە، کە ئەم نوێکردنەوەیە لە چوارچێوەی دیاریکردنی ئەو قەوارە و کەسانەدایە کە رێکارەکانی بەرەنگاربوونەوەی تیرۆر و وشککردنی سەرچاوە داراییەکانیان دەیانگرێتەوە، بەمەش چەند حزب و لایەنێک دەخرێنە ژێر چاودێری و سڕکردنی سەروەت و سامان.

PUKMEDIA