وتەبێژى پۆلیسى سلێمانى خانەنشین دەبێت

PUKMEDIA

وێنەیەکى کۆنگرەى رۆژنامەوانییەکە

ئەمڕۆ دووشەممە 1ى12ى2025 بە ئامادەبوونى بەڕێوەبەرى پۆلیسى سلێمانى، دواى ساتێک وەستان بۆ گیانى پاکى شەهیدان، لە مەراسیمێکدا خانەنشینبوونى وتەبێژى پۆلیسى سلێمانییان لە کۆنگرەیکى رۆژنامەوانیدا راگەیاند.

لە مەراسیمەکەدا عەمید د.ئارام محەمەد بەرێوەبەرى پۆلیسى سلێمانى رایگەیاند: رائید سەرکەوت ئەحمەد وتەبێژى پۆلیسى سلێمانى یەکێکە لە ئەفسەرە هەرە بە ئەمەک و دڵسۆزەکانى بەڕێوەبەرایەتییەکەمان، بەهۆى ئیشوکار و خزمەتەکانى کە پێشکەشى هەموو هەرێمى کوردستان و بەڕێوەبەرایەتیەکەمان و بەتایبەت ئەمنیەتى پارێزگاى سلێمانى کردووە.

ئاماژەیبەوەشدا: لە ماوەى کارکردنیدا لە بەشەکانى جوڵان و لێکۆڵینەوەى تاوان و نەهێشتنى تاوان راگەیاندن و زۆربەى بەشەکانى دیکە بە ماندوونەناسانە کاریکردووە، بێ لادان لە رێبازە سەرەکیەکە و ئیتیک و دیسپلینەکان و قەرزارى ئەو خزمەتەین کە پێشکەشى کردووە و شانازى پێوەدەکەین.

عەمید د.ئارام محەمەد بەڕێوەبەرى پۆلیسى سلێمانى داوایەکى ئاڕاستەى وەزارەتى ناوخۆى حکومەتى هەرێمى کوردستان و حکومەتى هەرێم و پەرلەمان کرد و رایگەیاند: چاوێکبخشێنێتەوە بە یاساى خانەنشینى هێزەکانى ئاسایشى ناوخۆ، چونکە ئێمەى ئەگەر بەراورد یان جیاوازیش بکەین حەقى خۆمانە، لەبەرئەوەى هێزەکانى ئاسایشى ناوخۆ و هێزە ئەمنیەکان لەهەموو کارمەندانى دیکەى حکومەت ماندوتر و ماندوونەناستر و لەخۆبوردەترن بۆ جێبەجێکردنى ئەرک و فەرمانەکان، و ئەمنیەتى هەموو شار و شارۆچکەکان و بەتایبەت سلێمانى لە ئەستۆى ئەو کۆمەڵە کارمەند و ئەفسەرەیە، بۆیە بە شایستەى نازانین کە هەمان مامەڵەى هێزەکانى ئاسایشى ناوخۆ و بۆ مافى خانەنشینى و مووچەى خانەنشینى وەک هەر فەرمانبەرێکى ئاسایى بکرێت، چونکە ئەو مەترسی و ماندوبونەى بۆ هێزەکانى ناوخۆ هەیە، لە پێناوى فەراهەم کردنى ئاسایشدا ئەرک و فەرمان دەبینن، شایستەى ئەوەیە کە دواى خانەنشینبوون و کۆتایى هاتن بە راژەى هەر ئەفسەر و کارمەندێکمان، بتوانێت بە شایستەترین شێوە ژیان بەرێتەسەر.

لە مەراسیمەکەدا رائید سەرکەوت ئەحمەدیش سوپاسى بەڕێوەبەرى پۆلیسى سلێمانى و ئەفسەر و کارمەندان و رۆژنامەنوسانى کرد و رایگەیاند: لەماوەى کارکردنمدا وەک وتەبێژ لەگەڵ رۆژنامەنوسان وا مامەڵەم کردوە، وەک ئەوەى لەگەڵ خۆمدا کاردەکەن و زانیارى دروستم بە راستگۆیانە پێڕاگەیاندون.

PUKMEDIA