مووچه‌خۆرانی هه‌رێم له‌چاوه‌ڕوانی دابه‌شكردنی مووچه‌ی مانگی ئه‌یلولدان

PUKMEDIA

پارەی عیراقی

دوای ئەوەی هەفتەی رابردوو وەزارەتی دارایی هەرێم داهاتی نانەوتی و راپۆرتی تەرازووی پێداچونەوەی رەوانەی بەغداد كرد، چاوەڕ‌وان دەكرێت لەم هەفتەیەدا  وەزارەتی دارایی عیراقیش پارەی مووچەی فەرمانبەران بۆ مانگی ئەیلول بخاتە سەر هەژماری بانكی وەزارەتی دارایی هەرێم .

ئەمەش لەكاتێكدایە مووچەخۆرانی عیراق مووچەی مانگەكانی 9 و 10 شیان وەرگرتووەو وابڕ‌یارە ئەم هەفتەیە مووچەی مانگی 11 یان پێبدرێت، بەڵام لەهەرێم چاوەڕ‌وانییەكان بۆ مووچەی مانگی نۆ_یە، بەو پێیەش تائێستا مووچەی دوو مانگی مووچەخۆرانی هەرێم بەنادیاریی ماوەتەوە.

لە رۆژانی سێ شەممە و چوارشەممەی هەفتەی رابردوو وەزارەتی دارایی هەرێم راپۆرتی تەرازووی پێداچونەوەی خەرجی و داهاتەكانی مانگی ئەیلوول و بڕ‌ی ( 120،000،000،000 ) سەدو بیست ملیار دیناری وەك داهاتی نانەوتی هەرێم بۆ مانگی ئەیلوول بۆ بەغداد نارد.

لەو بارەیەشەوە سەرچاوەیەك لە وەزارەتی دارایی حكومەتی هەرێمی كوردستان بە PUKMEDIA ی راگەیاند: پاش ناردنی 120 ملیار دینارەكە، چاوەڕ‌وان دەكەین وەزارەتی دارایی عیراق، لەم هەفتەیەدا مووچەی مانگی 9 بۆ هەرێم بنێرێت.

راشیگەیاند: بەناردنی مووچە لەبەغدادەوە راستەوخۆ وەزارەتی دارایی هەرێمی كوردستان لیستی مووچەی مانگی ئەیلول بڵاودەكاتەوەو لەماوەی چەند رۆژێكدا تەواوی مووچەخۆرانی هەرێم مووچەكانیان وەردەگرن.

لەساڵی 2024 دا مووچەخۆرانی هەرێم مووچەی مانگی 12 یان فەوتاو هەتا ئێستاش ئەو مووچەیەیان بەنادیاری ماوەتەوە، بەو پێیەش واچاوەڕ‌وان دەكرێت بۆ ئەمساڵی 2025_یش مووچەخۆرانی هەرێم دوو مووچەیان پێنەدرێت و تائێستا چارەنوسی ئەو دوو مووچەیە بەنادیاریی ماوەتەوە.

PUKMEDIA