سبەینێ 28هەمین فێستیڤاڵی نێودەوڵەتی گەلاوێژ لە سلێمانى بەڕێوەدەچێت

PUKMEDIA

وێنەیەکى فێستیڤاڵى رابردووى گەلاوێژ

سبەینێ پێنجشەممە 20ى11ى2025 ، 28هەمین فێستیڤاڵی نێودەوڵەتی گەلاوێژ لە سلێمانى بەڕێوەدەچێت.

فێستیڤاڵەکە بۆ ماوەى سێ رۆژ بەردەوام دەبێت و د.ئیبتیسام ئیسماعیل سەرۆکی بنکەی روناکبیری گەلاوێژ، بە وێبسایتى رەسمى یەکێتیى نیشتمانیى کوردستان PUKMEDIA  راگەیاند: یەکەم رۆژی فێستیڤاڵ ئاهەنگی دەستپێکە و چەندین بڕگەی موزیک و گۆرانی تێدا دەبێت و بە بەشداری هونەرمەندان ناسری رەزازی و ئەیوب عەلییە، هەروەها هەر لەیەکەمین رۆژی فێستیڤاڵدا چەندین بڕگەی هۆنراوە و خەڵات هەیە و لە دووەمین رۆژی فێستیڤاڵدا تەوەرێکمان تایبەتە بە 11توێژەر، کە توێژینەوەی هەمەچەشن لەخۆ دەگرێت و توێژەرەکان لە نەتەوەی کورد و عەرەب و فارسن، پاشان بەشداربوانی پیشبڕکێی هۆنراوە و چیرۆک بابەتەکانیان پێشکەش دەکەن، هاوکات  تەوەرێکی دیکەی فێستیڤاڵ زیرەکی دەستکردە لە جیهانی روناکبیری و رۆشنبیریدا بەگشتی.

ئەوەشى روونکردەوە: هەر لە چوارچێوەی فێستیڤاڵدا چەند چالاکیەکی دیکە هەیە، کە یەکێکیان پێشانگای کتێبە، کە خانەی چاپ و بڵاوکراوەکانی کوردی و عەرەبی و فارسین، کە کتێبی کوردی و عەرەبی و ئینگلیزی تێدایە، هەروەها پێشانگایەکی شێوەکاریمان بەناوی هەردوو هونەرمەندی شێوەکاری کۆچکردوی کورد "لالە عەبدە و قەرەنی جەمیل" دەبێت.

فێستیڤاڵی گەلاوێژ ساڵانە لە مانگی تشرینی دووەم لە لایەن بنکەی رووناکبیریی گەلاوێژ بەڕێوەدەچێت و ئەم فێستیڤاڵە لە ساڵی 1996 ھەتا ئێستا بێپچڕان بەردەوام بووە.

PUKMEDIA