کۆمسیۆن: ئەمڕۆ ئەنجامی بەرایی هەڵبژاردن رادەگەیەنرێت

PUKMEDIA

كۆمسیۆنی باڵای سەربەخۆی هەڵبژاردنەکانی عیراق

بڕیارە ئەمڕۆ دوای تێپەڕبوونی 24 سەعات بەسەر پرۆسەکەدا، ئەنجامی بەرایی هەڵبژاردنی گشتیی بۆ خولی شەشەمی ئەنجومەنی نوێنەرانی عیراق رابگەیەنرێت، کۆمسیۆنیش رایدەگەیەنێت: پرۆسەی هەڵبژاردنی گشتیی ئەنجومەنی نوێنەرانی عیراق بە سەرکەوتوویی کۆتاییهاتووە.

نەبەرد عومەر سەرۆکی دەستەی هەڵبژاردنەکانی هەرێم لە کۆمسیۆنی باڵای سەربەخۆی هەڵبژاردنەکانی عیراق، رایگەیاند: دوای ئەوەی هەڵبژاردنی گشتیی ئەنجومەنی نوێنەرانی عیراق بە سەرکەوتوویی کۆتاییهات، ئەمڕۆ چوارشەممە 12ی11ی2025 ئەنجامی بەرایی هەڵبژاردن رادەگەیەنین.

رۆژی 9ی 11ی 2025، هەڵبژاردنی تایبەت بۆ خولی شەشەمی ئەنجومەنی نوێنەرانی عیراق بەڕێوەچوو، بەپێی داتاكانی كۆمسیۆنی باڵای سەربەخۆی هەڵبژاردنەكان لە هەموو پارێزگاكانی عیراق ملیۆنێك و 313 هەزار و 980 ئەندامی هێزە ئەمنییەكان مافی بەشداریكردنیان لە دەنگدانی تایبەتدا هەبووە، لەو ژمارەیەش نزیكەی 270 هەزار دەنگدەری لە هەرێم بوون، كە 809 بنكەیان بۆ ئامادەكرابوو، لە 4 هەزار و 501 وێستگەدا دەنگیاندا، هەروەها 26 هەزار و 538 ئاوارەی ناوخۆ-ش مافی دەنگدانیان هەبوو كە 97 وێستگەیان لە 27 بنكەدا بۆ ئامادەكرابوو.

هاوکات دوێنێ 11ی11ی2025، سەعات 7:00ی سەرلەبەیانی، هەشت هەزار و 703 بنكەی دەنگدان كە لە 39 هەزار و 285 وێستگە پێكهاتبوون بەڕ‌ووی دەنگدەرانی عیراق و هەرێمی كوردستان كرانەوە، كە دەنگدەران لە كۆی حەوت هەزار و 700 كاندید 329 كاندید دەكەنە ئەندامی ئەنجومەنی نوێنەرانی عیراق.

PUKMEDIA