زیاتر لە 7 هەزار و 700 کاندید کێبڕکێ دەکەن بۆ پەرلەمانی عیراق

ئاژانسەکان

ئەنجومەنی نوێنەران

ئەمڕۆ یەکشەممە 9-11-2025 لەهەرێمی کوردستان و عیراق دەنگدانی تایبەت بۆ خولی شەشەمی ئەنجومەنی نوێنەرانی عیراق بەڕێوەدەچێت، کە باڵاترین دەسەڵاتی یاسادانان و چاودێریکردنە لە عیراق و رۆژی سێشەممەش پرۆسەی دەنگدانی گشتی بەڕێوەدەچێت، کە 7 هەزار و 743 کاندید کێبڕکێ دەکەن و 329 کاندید دەچنە پەرلەمان.

پرۆسەی دەنگدانی تایبەت بۆ هەڵبژاردنی خولی شەشەمی ئەنجومەنی نوێنەرانی عیراق لە هەرێم و عیراق دەستیپێکرد و لە هەرێمی کوردستان 270 هەزار دەنگدەر مافی دەنگدانیان هەیە، کە بەسەر 204 بنکەی دەنگدان و 958 وێستگە دابەش کراون، کە رێکخراوە ناوخۆیی و نێودەوڵەتییەکانی تایبەت بە پرسی هەڵبژاردن چاودێری دەکەن، هاوکات لەهەموو عیراق ژمارەی دەنگدەرانی دەنگدانی تایبەت ملیۆنێک و 313 هەزار و 980 کەسە.

بۆ ئەم هەڵبژاردنە لەسەرجەم حزب و لایەنەکانی هەرێم و عیراق ژمارەی کاندیدان 7 هەزار و 743 کاندیدە و لەو ژمارەیەش 2 هەزار و 247 کاندیدیان ژنن و 5 هەزار و 496 کاندیدیشیان پیاون

لە خولی پێنجەمی ئەنجومەنی نوێنەراندا کەلە 10ی تشرینی یەکەمی 2021 هەڵبژاردنەکەی بەڕێوەچوو، 329 کاندیدی حزب و لایەنەکان سەرکەوتن وبونە ئەندام و لە چوارچێوەی 25 لیژنەی هەمیشەیی و چەند لیژنەیەکەی لاوەکیدا کارەکانی ئەنجومەنەکەیان راپەڕاند.

رۆژی سێ شەمەش 11-11-2025 دەنگدانی گشتی بەڕێوەدەچێت و ژمارەی دەنگدەرانی گشتی لەم هەڵبژاردنە 20 ملیۆن و 63 هەزار و 733 کەسە، ئەمەش لەکاتێکدایە لەسەرانسەری عیراق 29 ملیۆن و 262 هەزار و 588 دەنگدەر هەیە، بەڵام لەو ژمارەیە 21 ملیۆن و 404 هەزار و 291 کەس هەڵگری کارتی بایۆمەترین و مافی بەشداریکردنیان لە پڕۆسەکە هەیە واتە 73%ی کۆی گشتی دەنگدەران.

هەروەها لە تەواوی عیراق هەشت هەزار و 703 ناوەندی دەنگدان و 39 هەزار و 285 وێستگەی دەنگدانی گشتی هەیە، لەهەمان کاتیشدا 809 ناوەندی دەنگدانی تایبەت و چوار هەزار و 501 وێستگەی دەنگدانی تایبەت هەیە.

ئەنجوومەنی نوێنەرانی عیراق باڵاترین دەسەڵاتی یاسادانان و چاودێریکردنە، هەر چوار ساڵ جارێک بە ئازادی و ڕاستەوخۆ لەلایەن دەنگدەرانەوە هەڵدەبژێردرێت، بۆ بەدیهێنانی بەرژەوەندی وڵات و نوێنەرایەتیکردنی هاووڵاتیان بە یاسادانان، کە هەر بەیاسا کاری دامودەزگاکانی دەوڵەت رێکدەخات، پەسەندکردنی بودجەی گشتی ساڵانە، پەسەندکردنی ڕێککەوتنە نێودەوڵەتییەکان، هەڵبژاردنی سەرۆک کۆمار،  چاودێریکردنی دەسەڵاتی جێبەجێکردن بۆ دڵنیابوون لە پابەندبوونی بە یاساکان و بەدیهاتنی بەرژەوەندییە باڵاکانی وڵات.

PUKMEDIA