کۆمسیۆن سبەی بنکەکانی دەنگدان رادەستی هێزە ئەمنییەکان دەکات

PUKMEDIA

کۆمسیۆنی باڵای سەربەخۆی هەڵبژاردنەکانی عیراق

کۆمسیۆنی باڵای سەربەخۆی هەڵبژاردنەکانی عیراق ئاشکرای کرد کە سبەینێ 6ی11ی2025 بنکەکانی دەنگدان رادەستی هێزە ئەمنییەکان دەکەن و دەنگدەریش تەنها بەکارتی بایۆمەتری دەنگدان دەتوانێت دەنگ بدات.

 لە راگەیەندراوێکیدا کە کۆپییەکی  بۆ PUKMEDIA نێردراوە، کۆمسیۆن رایگەیاندووە: سبەی رۆژی پێنج شەممە سەرجەم ئەو خوێندنگایانەی کە پرۆسەی دەنگدانیان تیایدا بەرێوەدەچێت رادەستی هێزە ئەمنییەکان دەکەن، بۆ ئەوەی بۆ رۆژی دەنگدان لە رووی ئەمنییەوە تەواو پارێزراو بن.

 پەیوەست بە میکانیزمەکانی دەنگدانیش، کۆمسیۆن ئاماژەی بەوەکردووە: لە رۆژی هەڵبژاردندا تەنها بە کارتی بایۆمەتری دەنگدان، دەنگدەر دەتوانێت دەنگ بدات، ئەو کارتە ناتوانرێت کەسێکی دیکە بەکاریبهێنێت.

لە بارەی سزای دارایشەوە، کۆمسیۆن ئاشکرای کردووە: تاوەکو ئێستا 500 حزب و کاندید بەهۆی سەرپێچییەوە سزای دارایی دراون.

ئەمەش لەکاتێکدایە، یەکێتیی نیشتمانیی کوردستان، بە لیستی ژمارە 222 لە پارێزگاکانی هەولێر و سلێمانی( لەناویدا هەڵەبجە)، دهۆک و کەرکوک و  دیالە بەشداری کردووە، هاوکات لە پارێزگای نەینەواش بە هاوپەیمانیی خەڵکی نەینەوا بە لیستی ژمارە 281  بەشداری کردووە، هاوکات لە پارێزگای سەلاحەدینیش بە یەک کاندید لە ناو لیستی هاوپەیمانی جەماوەری نیشتمانیی بە ژمارە 240 بەشداری لە هەڵبژاردنەکەی رۆژی 11ی11ی2025 دا دەکات.

PUKMEDIA