لیستی ٢٢٢: دەرچووانی بەشە گەشتوگوزارییەکان دابمەزرێندرێن

PUKMEDIA

لیستی٢٢٢

هەرێمی کوردستان لە ڕووی پێکهاتە و هەڵکەوتەی جوگرافییەوە ناوچەیەکی زۆر گرنگ و گونجاوە بۆ پێشخستنی كەرتی گەشتوگوزار، کە دەبێتە هۆی گەشەپێدانی ژێرخانی ئابووری و ڕەخساندنی هەلی کار و دەتوانێت ببێتە پردێکی پەیوەندی جڤاکی و هونەری و کەلتووری لەگەڵ گەلان و نەتەوەکانی ناوچەکە و جیهان، بەتایبەتی لەگەڵ پارێزگاکانی ناوەڕاست و باشوری عیراق، لەوچوارچێوەیەشدا یەکێتیی نیشتمانیی کوردستان وەک کاری هەمیشەیی خۆی لەکارنامە و ستراتیجی لیستی ٢٢٢ ی یەکێتیی نیشتمانیی کوردستان-دا بەرنامەیەکی بەپێزی بۆ داڕشتووە، کە خۆی لەم خاڵانەی خوارەوەدا دەبینێتەوە:

1-هەرێمی کوردستان بۆ گەشتوگوزاری هەمەجۆر زۆر گونجاوە، چونکە لەسەر ئاستی هەموو پارێزگاکان دەیان شوێنی دڵڕفێنی گەشتوگوزاری، سەیرانگا، شوێنەواری مێژوویی وەکو قەڵا، ئەشکەوتی میژوویی، شاخ، شوێنەوار و پەرستگای ئایینی هەیە. بۆیە پلانمان هەیە کە هەرێمی کوردستان وەکو ناوچەیەکی گرنگی گەشتیاری بناسێنرێت، تاوەکو لە ڕێی ئەو پلانەوە زیاتر سەرنجی گەشتیاران بۆ هەرێمی کوردستان ڕابکێشین.

2-داڕشتنی پلانێکی سەرتاسەری بۆ ئەوەی هاوڵاتیانی هەرێمی کوردستان و خاوەنی شوێنە گەشتیارییەکان هۆشیاری گەشتیارییان زیاتر بێت و بتوانن بە شێوەیەکی باشتر پێشوازی لە گەشتیاران بکەن.

3-دانانی پلانێک بە هەماهەنگی لەگەڵ زانکۆ و پەیمانگاکان و دەستەی گەشتوگوزاری هەرێم بۆ دامەزراندنی دەرچووانی بەشەکانی گەشتوگوزاری لە هۆتێل و شوێنە گەشتیارییەکان.

4-هاندان و ڕەخساندنی دەرفەتی زیاتر بۆ ئەو سەرمایەدارانەی کە دەخوازن سەرمایەی خۆیان لە كەرتی گەشتوگوزاریدا بخەنەگەڕ.

5-گرنگیدانێکی زیاتر بە یاری وەرزشی، شاخەوانی، کێبڕکێی مەلەوانی، یارییەکانی دیکە لە ناوچە گەشتیارییەکانی هەرێمی کوردستان.

6-ئەنجامدانی چالاکی هونەری، ئاهەنگ و کۆنسرێت و ڤیستیڤاڵ، بەمەش سەرنجی گەشتیاران ڕابکێشن تاکو سەردانی ناوچە گەشتیارییەکانی هەرێمی کوردستان بکەن.

7-دروستکردنی یاریگا، هۆڵی وەرزشی، هوتێلی پێشکەوتوو لە ناوچە گەشتیارییەکان و دابینکردنی خزمەتگوزارییە پێویستەکان.

8-گرنگیدان بە شوێنە گەشتیارییەکان، بە شێوەیەک کە ببێتە سەرچاوەیەکی گرنگی بەدەستهێنانی داهات.

PUKMEDIA