مەكتەبی سیاسی پیرۆزبایی لەمیدیاكارانی مەكتەبی راگەیاندن و هۆشیاری دەكات

PUKMEDIA

لۆگۆى یەکێتیى نیشتمانیى کوردستان

مەكتەبی سیاسی، لەیادی یۆبێڵی زێڕ‌ینی راگەیاندنی یەكێتیی نیشتمانیی كوردستاندا، پەیامێكی پیرۆزبایی ئاڕاستەی رۆژنامەنووسان و میدیاكارانی كەناڵەكانی مەكتەبی راگەیاندن و هۆشیاری دەكات و  رایدەگەیەنێت: میدیای یەكێتی پێشەنگیی لەبوارەكەدا تۆماركردوە و نموونەی راستبێژی و متمانەیەكی پتەو بووە لای وەرگرانی كوردستان، هاوكات كەناڵەكانی میدیای یەكێتی چەندین رۆژنامەنوس و میدیاكاریان پێگەیاندوە كە ئێستا لە دەزگا و دامەزراوە بەناوبانگەكانی كوردستان و عیراقدا كاردەكەن.

دەقی پەیامەكە:

هەڤاڵان رۆژنامەنووسان و میدیاكارانی كەناڵەكانی مەكتەبی راگەیاندن و هۆشیاری 

لە یادی یۆبێڵی زێڕینی راگەیاندنی یەكێتیی نیشتمانیی كوردستاندا، پیرۆزباییەكی گەرمتان ئاڕاستە دەكەین و هیوادارین هەمیشە لە سەركەوتنی بەردەوامدا بن.

كاروانی میدیایی یەكێتی هەر لە سەرەتای دامەزراندنەوە بۆ شوناسی یەكێتیی نیشتمانیی كوردستان  وەك رێكخراوێكی سیاسی و گەیاندنی دەنگ و ئامانجەكەی، لەڕۆژێكی وەك ئەمڕۆی ساڵی 1975 دا مانگنامەی (الشرارە) و دواتر رێبازی نوێی دەرچواند، لەو كاتەوە تاكو ئەمڕۆ كەناڵەكانی لە گشت قۆناغەكاندا نموونەی راستبێژی و میدیای دەربەست بوون و متمانەیەكی پتەویان لای خوێنەر و گوێگر و بینەری كوردستان بنیاتناوە.

لەدوای راپەڕینیش، میدیای یەكێتی لەگەڵ گۆڕانكارییە نوێیەكاندا هەنگاوی ناوە و دەستپێشخەر بووە لە دەرچواندنی یەكەمین رۆژنامەی رۆژانەی بەردەوام و دامەزراندنی یەكەمین كەناڵی تەلەفزیۆنی كە گوزارشتی راستەقینە لە خواستی بینەری كورد بكات، بەمانەش میدیای یەكێتی پێشەنگیی لە بوارەكەدا تۆماركردوە.

پێش دامەزراندنی بەشەكانی رۆژنامەنووسی و راگەیاندن لە پەیمانگا و زانكۆكانی كوردستاندا، كەناڵەكانی میدیای یەكێتی چەندین رۆژنامەنوس و میدیاكاریان پێگەیاندوە كە ئێستا لە دەزگا و دامەزراوە بەناوبانگەكانی كوردستان و عیراقدا كاردەكەن.

ئەمڕۆش ئەم یادە هاوكاتە لەگەڵ هەڵمەتی بانگەشەی هەڵبژاردن بۆ پەرلەمانی عیراق، لەم ئەركەشدا  كەناڵەكانی بۆردی  ڕاگەیاندنی  یەكێتیی بەوپەڕی هەستكردن بە لێپرسراوێتی و پابەندبوون بە پرەنسیپەكانی ئیتیكی رۆژنامەوانییەوە ، كار لەسەر گەیاندنی پەیام و بەرنامەی لیستی ٢٢٢ ی یەكێتیی نیشتمانیی كوردستان دەكەن و خۆیان  لە هەر ئاراستەیەكی چەواشەكارانه بە دوورگرتوه كە ئەمەش نیشانەیەكی تری ئومێد بەخشینە بۆ كۆمەڵانی خەڵكی كوردستان.

جارێكی تر لەم یادەدا هیوای سەركەوتنی بەردەوام بۆ رۆژنامەنووسان و میدیاكارانی یەكێتی لەگشت كەناڵەكانی راگەیاندندا دەخوازین.

مەكتەبی سیاسیی 
یەكێتیی نیشتمانیی كوردستان

PUKMEDIA