لقی سلێمانی سەندیکای رۆژنامەنوسان کێشەی رووماڵی هەڵبژاردن چارەسەردەکات

لقی سلێمانی سەندیکای رۆژنامەنوسان

بینای لقی سلێمانی سەندیکای رۆژنامەنوسانی کوردستان

بۆ رووماڵی پرۆسەی هەڵبژاردنی ئەنجومەنی نوێنەرانی عیراق، تەنها ئەو کەناڵ و دەزگایانە دەتوانن روماڵ بکەن کە مۆڵەتی رەسمیان لە بەغدادەوە هەیە، لقی سلێمانی سەندیکای رۆژنامەنوسانی کوردستانیش رایدەگەیەنێت: لیستی 160 دەزگاو کەناڵی دیجیتاڵ میدیا رەوانەی کۆمیسیۆن کراوە ئەوانەی تەنها لە هەرێمی کوردستان خاوەنی مۆڵەتی رەسمین.

کاروان ئەنوەر سکرتێری لقی سلێمانی سەندیکای رۆژنامەنوسانی کوردستان لە لێدوانێکیدا بە PUKMEDIA ی راگەیاند: پاش گفتوگۆو دانیشتن لەگەڵ ئۆفیسەکانی ھەولێرو سلێمانی کۆمسیۆنی باڵای سەربەخۆی ھەڵبژاردنەکان، لە ئەنجومەنی باڵای سەندیکای رۆژنامەنووسانی کوردستانەوە، لیستی 160 دەزگاو کەناڵی دیجیتاڵ میدیا رەوانەی کۆمیسیۆن کراوە ئەوانەی تەنها لە هەرێمی کوردستان خاوەنی مۆڵەتی رەسمین.

وتیشی: بەھیواین لە کورتترین کاتدا رەزامەندی لەسەر باجی روماڵی میدیایی رۆژانی دەنگدان بگاتە پارێزگاکانی کوردستان و تیمەکانمان، چونکە ئەمساڵ لە بەغدادەوە چاپ دەکرێن.

 لە کۆتایشدا، کاروان ئەنوەر دڵنیایی بە دەزگا و میدیاکان دا بەوەی پێش 7ی11ی2025 کە دوایین کاتە بۆ پێدانی مۆڵەتی میدیاکان کێشەکەیان بۆ چارەسەر دەکات.

PUKMEDIA