قوباد تاڵەبانی: یەکێتی دەتوانێت و دەیەوێت کێشەکان لە بەغداد چارەسەر بکات

راگەیاندنی قوباد تاڵەبانی

قوباد تاڵەبانی، سەرپەرشتیاری بازنەی هەولێری لیستی 222ی یەکێتیی نیشتمانیی کوردستان

قوباد تاڵەبانی، سەرپەرشتیاری بازنەی هەولێری لیستی 222ی یەکێتیی نیشتمانیی کوردستان بۆ هەڵبژاردنی خولی شەشی ئەنجومەنی نوێنەرانی عیراق،  لە کۆبوونەوەی لەگەڵ هەڤاڵانی بازنەکانی سۆران و دیانا و باڵەکیان دووپاتی کردەوە: یەکێتی ئەو هێزەیە کە هەم دەتوانێت و هەم دەیەوێت کێشەکان لە بەغداد چارەسەر بکات.

 قوباد تاڵەبانی لەو کۆبوونەوەیەدا، رایگەیاند: رەنگە زۆر کەس و لایەن بتوانێت بە ئاسانی باس لە کێشە و گرفتەکانی خەڵک بکات، چونکە روونە کێشە و داواکاریی خەڵک چییە، بەڵام هەموو کەس و لایەنێک توانا و هێزی پێویستی نییە چارەسەریان بکات، یەکێتی ئەو هێزەیە کە هەم دەتوانێت و هەم دەیەوێت کێشەکان لە بەغداد چارەسەر بکات.

ئاماژەی بەوەشکرد: دابەشبوونی دەنگی خەڵکی ناڕازی و بەشدارینەکردن لە هەڵبژاردن لە بەرژەوەندی ئەو لایەنەیە کە هۆکار و سەرچاوەی کێشەکانە، بۆیە پێویستە هەڤاڵانمان لەم ماوەیەدا هەموو هێزی خۆیان بخەنەگەڕ تا زۆرترین خەڵکی ناڕازی هان بدەن تا دەنگ بدەن بە یەکێتی، چونکە بەڵێن و بڕیاری یەکێتییە کە دەبێتە هێزی خەڵکی ناڕازی کوردستان لە بەغداد و لە کوردستان.

قوباد تاڵەبانی دووپاتیشی کردەوە: قەزای سۆران بۆ یەکێتی مەڵبەندێکی زۆر گرنگە، چونکە شوێنی بەیەکگەیشتن و تێکەڵاوبوونی چەندین زاراوە و کلتوری جوانی کوردستانە، هەروەها دەڤەری باڵەکایەتیش روونە کە بۆ یەکێتی ئەو دەڤەرە هەمیشە سەوزەیە کە خەڵکەکەی لە هەنگوینەکەی شیرینترن و یەکێتی و باڵەکیان رەگیان لەناو یەکتردا داکوتیوە و لە یەک دەچن و هیچ کامیان هەرگیز دەستەمۆ ناکرێن.

PUKMEDIA