مه‌راسیمی ناساندنی كاندیدانی یەکێتى هاوپه‌یمانی خه‌ڵكی نه‌ینه‌وا 281 به‌ڕ‌ێوه‌ده‌چێت

دەرباز ستار

وێنەیەکى مەراسیمەکە

ئه‌مڕ‌ۆ شه‌ممه‌ 25ی10ی2025 له‌ مه‌خمور مه‌راسیمی ناساندنی كاندیدانی یەکێتى هاوپه‌یمانی خه‌ڵكی نه‌ینه‌وا به‌ژماره‌ 281 به‌ڕ‌ێوه‌چوو، لێپرسراوی مه‌ڵبه‌ندی 20ی قه‌ره‌چووغیش رایگه‌یاند: یه‌كێتی له‌ناو هاوپه‌یمانێتییه‌كه‌دا، كاندیدی له‌ سه‌رجه‌م پێكهاته‌ و نه‌ته‌وه‌كان هه‌یه‌.

سه‌ره‌تای مه‌راسیم به‌ ساتێك وه‌ستان بۆ گیانی پاكی شه‌هیدان و سروودی مه‌شخه‌ڵان ده‌ستیپێكرد، پاشان وته‌ی به‌خێرهاتن له‌ لایه‌ن سه‌ردار سیامه‌ند لێپرسراوی مه‌ڵبه‌ندی 20ی قه‌ره‌چووغه‌وه‌ پێشكه‌شكرا و رایگه‌یاند: ئه‌م لیسته‌ له‌ساڵی 2023 له‌ هه‌ڵبژاردنی ئه‌نجومه‌نی پارێزگاكان راگه‌یه‌نرا و ئێستاش و داهاتووش هه‌ر له‌ژێر ئه‌و ناونیشانه‌ ده‌بێت، ئه‌مه‌ش له‌ سۆنگه‌ی باوه‌ڕ‌بوونی یه‌كێتییه‌ به‌ سیاسه‌تی حه‌كیمانه‌ی خوالێخۆشبوو ره‌وانشاد سه‌رۆك مام جه‌لال تاڵه‌بانی و سیاسه‌تی چه‌پكه‌ گوڵه‌كه‌.

ئاماژه‌ی به‌وه‌شدا: سه‌رۆك بافڵ-یش ئێستا له‌سه‌ر هه‌مان رێچكه‌ به‌رده‌وامه‌ و هه‌مووانیش له‌سه‌ر ئه‌و رێچكه‌یه‌ین.  

سه‌ردار سیامه‌ند ئه‌وه‌شی روونكرده‌وه‌: له‌ ئێستادا یه‌كێتیی نیشتمانیی كوردستان له‌پارێزگای نه‌ینه‌وا لە چوارچێوەى هاوپەیمانێتى یەکێتى خەڵکى نەینەوادا له‌هه‌موو پێكهاته‌ و نه‌ته‌وه‌كان کاندیدى هەیە.

سه‌ردار سیامه‌ند لێپرسراوی مه‌ڵبه‌ندی 20ی قه‌ره‌چووغ، په‌یامێكی ئاڕ‌استه‌ی خه‌ڵكی سنوری مه‌خموور و دانیشتوانی هه‌ولێر و شاره‌كانی دیكه‌ كرد، كه‌ ده‌نگده‌ری مادده‌ی 140ن و رایگه‌یاند: له‌به‌ر ئه‌وه‌ی ئێره‌ ناوچه‌ی كێشه‌ له‌سه‌رن، من داواده‌كه‌م به‌ گڕ‌وتینه‌وه‌ به‌شداری ده‌نگدان بكه‌ن و ده‌نگبده‌ن به‌ یەکێتى هاوپه‌یمانێتی  خه‌ڵكی نه‌ینه‌وا ژماره‌ 281.

رۆژی 9ی4ی2025 ئەنجومەنی وەزیرانی عیراق بە زۆرینەی دەنگ، 11ی 11ی 2025ی وەك رۆژی هەڵبژاردنی داهاتووی ئەنجومەنی نوێنەرانی عیراق دیاریكرد.

PUKMEDIA