ژمارەیەك كاندیدی یەكێتی: ئەگەر پۆستەرەكانمان ئاستەنگیان دروستكرد لێیبكەنەوە

PUKMEDIA

بانگەشەی لیستی ٢٢٢ ی یەكێتیی نیشتمانیی كوردستان

ژمارەیەك كاندیدی یەكێتیی نیشتمانیی كوردستان، بۆ هەڵبژاردنی ئەنجومەنی نوێنەرانی عیراق، بۆ بەڕێكردنی هەڵمەتێكی بانگەشەی ئارام و دروستنەكردنی ئاستەنگی هاتوچۆ بۆ هاووڵاتیان و شۆفێران، لە پۆستی جیاجیادا داوا دەكەن لەهەر شوێنێك پۆستەر و فلێكسەكانیان ئاستەنگیان دروستكردبوو لێبكربَنەوە و لاببرێن.

ئاودێر مامۆستا عەزیز، كاندیدی ژمارە ٣٤، لەسەر لیستی ٢٢٢ ی یەكێتیی نیشتمانیی كوردستان، لە بازنەی سلێمانی، بۆ هەڵبژاردنی ئەنجومەنی نوێنەرانی عیراق بە وێبسایتی رەسمیی یەكێتی PUKMEDIA ی راگەیاند: هەر پۆستەرێكی من ئاستەنگی هاتووچۆی دروست كرد و بوو بە مایەی دروستبوونی كێشە یاخود رێگربوو لە شاردنەوەی ریكلام و پۆستەری كاندیدێكی دیكە لەسەر هەر لیست و قەوارەیەك بێت، تكایە بەبێ پرس لایبەرن.

راشیگەیاند: بڕیارمداوە هیچ جۆرە ریكلام و پڕوپاگەندەیەك نەكەم كە دوور بێت لە ئاین و ئاداب و دابونەریت و پەروەردەی بەرزی كۆمەڵگەكەم.

یەكێتیی نیشتمانیی كوردستان لە پارێزگاكانی هەولێر، سلێمانی، دهۆك، هەڵەبجە، كەركوك و دیالە بە لیستی سەربەخۆ بە ناوی لیستی (یەكێتیی نیشتمانیی كوردستان) بە ژمارە ٢٢٢ بەشداری هەڵبژاردنی ئەنجومەنی نوێنەرانی عیراق دەكات، هاوكات لە پارێزگای نەینەوا  لە چوارچێوەی هاوپەیمانێتییەكدا بەناوی (هاوپەیمانی یەكێتی خەڵكی نەینەوا) بە ژمارە ٢٨١ بەشداری هەڵبژاردنەكە دەكات.

PUKMEDIA