وەزیری نەوتی عیراق: زیاتر لە یەک ملیۆن بەرمیل نەوت لە هەرێم وەرگیراوە

واع

حەیان عەبدولغەنی وەزیری نەوتی عیراق

ئەمڕۆ4ی10ی2025، حەیان عەبدولغەنی وەزیری نەوتی عیراق ڕایگەیاند، تا ئێستا زیاتر لە یەک ملیۆن بەرمیل نەوت لە هەرێمی کوردستان وەرگیراوە، دووپاتیشی کردەوە یەکەم کەشتی نەوت هەڵگر بەندەری جیهانی جێهێشتووە.

وەزیری نەوتی عیراق ڕاگەیاند: "چەند ڕۆژێک لەمەوبەر، هەناردەکردنەوەی نەوت لە هەرێمی کوردستانەوە بۆ بەندەری جەیهان لە ڕێگەی بۆری عیراق- تورکیا دەستیپێکردەوە، کە بۆ ماوەی زیاتر لە دوو ساڵ بوو راگیرا بوو.

ئاماژەی بەوەشکرد، " حکومەتی فیدراڵ نەوتی بەرهەمهێنراو لە هەرێم وەردەگرێت و بەرپرسیارە لە هەناردەکردنی بۆ دەرەوەی عیراق".
 پەیوەست بەو بڕەشی کە وەریانگرتووە، وەزیری نەوت ئاشکرای کرد: بڕی نەوتی وەرگیراو تا ئێستا گەیشتووەتە زیاتر لە یەک ملیۆن بەرمیل، ئەوەشی خستەڕوو، لەئێستادا 650 هەزار بەرمیل نەوتی هەرێمی کوردستان بارکراوە بۆ فرۆشتن و ئاڕاستەی ئەو شوێنانەکراوە کە گرێبەستیان لەگەڵ ئەنجامدراوە.

ئەمەش لەکاتێکدایە، رۆژی شەممە 27ی9ی2025 وه‌زاره‌تی نه‌وتی عیراق ده‌ستپێكردنه‌وه‌ی هه‌نارده‌ی نه‌وتی هه‌رێمی كوردستانی راگه‌یاند و ئاشكرایكرد: "به‌بێ كێشه‌ پڕ‌ۆسه‌كه‌ ده‌ستیپێكرده‌وه‌"، پڕ‌ۆسه‌ی هه‌نارده‌كردنه‌وه‌ی نه‌وتی خاوی هه‌رێم له‌ڕ‌ێگه‌ی هێڵی عیراق – توركیا ده‌ستیپێكرده‌وه‌و کە بڕی 190هه‌زار به‌رمیلی رۆژانەی له‌ڕ‌ێگه‌ی بۆرییه‌وه‌ ره‌وانه‌ی به‌نده‌ری جه‌یهان كرا.

PUKMEDIA