وتەبێژی کۆمسیۆن: وەرگرتنەوەی کارتی دەنگدان بەردەوامە

کوردستان 10:52 AM - 2025-09-30

وتەبێژی کۆمسیۆنی باڵای سەربەخۆی هەڵبژاردنەکانی عیراق رایدەگەیەنێت: پرۆسەی چاپکردنی کارتی دەنگدان بۆ هەڵبژاردنی داهاتووی ئەنجومەنی نوێنەران بەردەوامە و وەرگرتنەوەی کارتی دەنگدانیش تا کاتی هەڵبژاردن بەردەوام دەبێت

جومانە غەلای وتەبیژی کۆمسیۆنی باڵای سەربەخۆی هەڵبژاردنەکانی عیراق، بەوێبسایتی رەسمیی یەکێتیی نیشتمانیی کوردستان PUKMEDIA ی راگەیاند: دوای نوێکردنەوەی تۆماری دەنگدەران و سەردانی هاووڵاتیان بۆ ناوەندەکانی کۆمسیۆن، پرۆسەی چاپکردنی کارتی دەنگدان بەردەوامە.

راشیگەیاند: هەر کارتێکی دەنگدان تەواوبکرێت، لەڕێگەی هەمان ناوەندی کۆمسیۆنەوە دەدرێتەوە بە هاووڵاتیان، پرۆسەکەش تا کاتی هەڵبژاردن بەردەوام دەبێت.

سەردانی ناوەندەکانی کۆمسیۆن بکەن

هاوکات نەبەرد عومەر سەرۆکی دەستەی هەڵبژاردنەکانی هەرێمی کوردستان رایگەیاندووە: کارتی دەنگدانی هەموو ئەو کەسانە تەواوکراوە، کە لە 25ی3ی2025 تا 22ی6ی2025 سەردانی ناوەندەکانی کۆمسیۆنیان کردووە، هاووڵاتیان دەتوانن ئێستاش سەردانی ناوەندەکانی کۆمسیۆن بکەن و کارتی دەنگدان وەربگرنەوە.

راشیگەیاند:لە کۆتایی مانگی 10 ی ئەمساڵ بەشی دووەمی وەرگرتنەوەی کارتی دەنگدان دەستپێدەکات.

PUKMEDIA