هەناردەكردنی نەوتی كەركوك بۆ ئوردن دەستپێدەكاتەوە

کوردسات نیوز

پاڵاوگەیەکی نەوت

لە سەرەتای مانگی داهاتووەوە هەناردەكردنی نەوتی كەركوك بۆ ئوردن دەستپێدەكاتەوە و بڕیارە هەر بەرمیلێكی 16 دۆلار لە خوار بازاڕەوە بفرۆشرێت.

وەزارەتی وزە و سامانە كانزاییەكانی ئوردن رایگەیاند: ساڵح خەرابشە وەزیری وزە و سامانە كانزاییەكانی ئوردن لە سەردانێكیدا بۆ عیراق لەگەڵ حەیان عەبدولغەنی وەزیری نەوتی فیدراڵ كۆبووەوە و رێككەوتنێكی لێكتێگەیشتنیان ئیمزاكرد بۆ ئەوەی رۆژانە 10 هەزار بەرمیل نەوت هەناردەی ئوردن بكرێت.

هاوکات چەند سەرچاوەیەكیش لە كۆمپانیای نەوتی باكور بە میدیا عیراقیەكانیان راگەیاند: رێككەوتنەكە بۆ سێ مانگ بە هەمان مەرجەكانی پێشووتر درێژ كراوەتەوە و ئەو نەوتەی هەناردەی ئوردن دەكرێت بەرهەمهێنراوی كێڵگەكانی كەركوكە و لەڕێگەی تانكەرەوە دەگوازرێتەوە بۆ پاڵاوگەی زەرقا لە ئوردن.

ئەمەش لەکاتێکدایە، بڕیارە ئوردن تێچووی بەرهەمهێنان و گواستنەوەی نەوتەكە لە ئەستۆ بگرێت، لەبەر ئەو هۆكارەش عیراق هەر بەرمیلێك بە 16 دۆلار  كەمتر لە نرخی ئاسایی بە ئوردن دەفرۆشێت.

PUKMEDIA