حکومەتی هەرێم: پەلە بکرێت له یەکلاییکردنەوەی دۆسیەی داهاتی نانەوتی

فەرمانگەی میدیا و زانیاری

کۆبوونەوەی ئەنجومەنی وەزیرانی هەرێمی کوردستان

کۆبوونەوەی ئەنجومەنی وەزیرانی هەرێمی کوردستان کۆتایی هات و فەرمانگەی میدیا و زانیاریش رایدەگەیەنێت؛  حکومەتی هەرێم داوا دەکات پەلە بکرێت له یەکلاییکردنەوەی دۆسیەی داهاتی نانەوتی بە ڕێکكەوتنێکی هاوبەشی نێوان هەردوو حکومەتی هەرێم و فیدراڵ.

بەپێی راگەیەندراوێکی فەرمانگەی میدیا و زانیاری، لە کۆبوونەوەکەدا، ئامانج ره‌حیم سكرتێری ئه‌نجومه‌نی وه‌زیران ئاماژەی بەوەکردووە؛ چاوه‌ڕ‌ان ده‌كرێت به‌جێبه‌جێكردنی ڕ‌ێككه‌وتنه‌كه‌، ئیتر سه‌قامگیری له‌ ناردنی ماف و مووچه‌ و شایسته‌ داراییه‌كانی هه‌رێمی كوردستان بێته‌كایه‌وه‌و چیتر مووچه‌خۆرانی هه‌رێم بێبه‌ش نه‌كرێن له‌ وه‌رگرتنی مووچه‌كانیان له‌ كات و ساتی خۆی هاوتای مووچه‌خۆرانی ناوچه‌كانی دیكه‌ی عیراق.

 هەر بەپێی راگەیەندراوەکە،ئه‌نجومه‌نی وه‌زیرانی هه‌رێمی كوردستان چاوه‌ڕ‌وان ده‌كات مووچه‌ی مانگی ئاب و مانگه‌كانی دیكه‌ش بۆ هه‌رێم خه‌رجبكرێت، داواشی لە وەزارەتی دارایی هەرێم کردووە بە زووترین کات بڕی 120 ملیار دینار بخەنە سەر هەژماری وەزارەتی دارایی عیراق.

لە کۆتایشدا، ئەنجومەنی وەزیرانی هەرێم داوای کردووە: پەلە بکرێت لەسەر یەکلاییکردنەوەی دۆسیەی داهاتی نانەوتی بە ڕێکكەوتنێکی هاوبەشی نێوان هەردوو حکومەتی هەرێم و فیدراڵ، بۆ ئەم مەبەستەش، ئامادەیی نیشان دا بۆ هاوئاهەنگیکردن لەگەڵ ئەو لیژنە وەزارییە شەش کەسییەی، کە بۆ بابەتی داهاتە نانەوتیەکان لە بەغدا پێکهێنراوە.

PUKMEDIA