لە هەرێمی کوردستان ساڵی نوێی خوێندن دەستیپێکرد

پەروەردەی سلێمانی

دەستپێکردنی ساڵی نوێی خوێندن

ئەمڕۆ 21ی9ی2025،بە ئامادەبوونی خاتوو شاناز ئیبراهیم ئەحمەد خانمی یەکەمی عیراق و د. هەڤاڵ ئەبوبەکر پارێزگاری سلێمانی و ئاوات محەمەد قائیمقامی سلێمانی و مامۆستا نەژاد عبدوڵڵا بەڕێوەبەری گشتی پەروەردەی سلێمانی و بەرپرسانی پەروەردەی سلێمانی،  زەنگی دەستپێکردنی ساڵی نوێی خوێندن لە سلێمانی و سەرانسەری هەرێمی کوردستان لێدرا و نزیکەی دوو ملیۆن خوێندکار ڕوویان لە خوێندنگاکان کردەوە.

بەپێی ئامارەکانی ساڵانی رابردوو، ساڵانە نزیکەی ملیۆنێک و 800 هەزار خوێندکار لە هەرێمی کوردستان دەخوێنن، بەڵام تاوەکو ئێستا ژمارەی خوێندکارانی ئەمساڵ بە دیاریکراوی رانەگەیێندراوە، هاوکات 154 هەزار خوێندکاریش لە خوێندنی ناحکومی دەست بە خوێندن دەکەن. ئەم ژمارەی خوێندکاران لە شەش هەزار و 844 خوێندنگە و قوتابخانەی حکومی دەوام دەکەن، جگە لە 594 خوێندنگە و قوتابخانەی ناحکومی،هەروەها 28 باڵەخانەی نوێی خوێندن بۆ ئەم ساڵە ئامادەکراون.

پەیوەست بە خوێندکارانی نوێی وەرگیراو بۆ ساڵی خوێندنی 2025-2026، زیاتر لە 139 هەزار خوێندکاری نوێ ناویان تۆمار کراوە، هەروەها 22 ملیۆن و 134 هەزار و 74 کتێبی پرۆگرامەکانی خوێندن چاپکراون و 500 ناونیشانی کتێب گۆڕانکارییان بەسەردا هاتووە.

  PUKMEDIA