تیروپشک بۆ هەڵبژاردنی کارمەندانی بنکەکانی دەنگدان دەکرێت

PUKMEDIA

لۆگۆی کۆمسیۆن

رۆژی یەك شەممەی داهاتوو كۆمسیۆنی باڵای سەربەخۆی هەڵبژاردنەكانی عیراق تیروپشك بۆ هەڵبژاردنی كارمەندانی بنكەكانی دەنگدان دەكات و بڕی پاداشتی کارمەندانیش دیاریدەکات.


ئەحلام جابری ئەندامی دەستەی كۆمسیاران لە كۆمسیۆنی باڵای سەربەخۆی هەڵبژاردنەكانی عیراق بە رۆژنامەی سەباحی راگەیاندوە، رۆژی یەكشەممەی داهاتوو كۆمسیۆن تیروپشك ئەنجام دەدات بۆ هەڵبژاردنی ناوی كارمەندانی بنكەكانی دەنگدان بۆ هەڵبژاردنی ئەنجومەنی نوێنەران، ئەمەش لە چوارچێوەی ئامادەكارییە تەكنیكییە بەردەوامەكان بۆ بەجێگەیاندنی پڕۆسەی هەڵبژاردن.

پەیوەست بە پاداشتی کارمەندانی سەرسندووق، رۆژنامەکە ئاشکرای کردووە: بۆ دەنگدانی تایبەت یان گشتی، پاداشتی كارمەندانی بنكە و وێستگكەكانی دەنگدان بۆ فەرمانبەرانی حكومەت و خوێندكارانی زانكۆ و دەرچووان جیاواز دەبێت، بەجۆرێك كە فەرمانبەران بۆ رێكخەری بنكە بڕی 300 هەزار دینار وەردەگرن، بۆ بەڕێوەبەری وێستگە  200 هەزار دینار و  150 هەزار دیناریش بۆ كارماندانی وێستگەی دەنگدان.
بەڵام خوێندكاران و دەرچووان،  400 هەزار دینار بۆ ڕێكخەری بنكە و 300 هەزار دینار بۆ بەڕێوەبەری وێستگە  و 250 هەزار دینار  بۆ كارمەندان وەردەگرن.

بەپێی زانیارییەکانی PUKMEDIA لە سەرجەم پارێزگاکانی عیراق، 825 هەزار و 907 کەس فۆڕمیان پڕکردووەتەوە تاوەکو لەڕۆژی هەڵبژاردنی ئەنجومەنی نوێنەرانی عیراقدا وەک کارمەند کاربکەن.

ئەمەش لە كاتێكدایە، ئەنجومەنی وەزیرانی عیراق، رۆژی 9ی4ی2025 لە كۆبوونەوەی ئاسایی خۆیدا، رۆژی 11ی11ی2025ی وەك رۆژی ئەنجامدانی هەڵبژاردنی ئەنجومەنی نوێنەران دیاریكرد.

PUKMEDIA