داوا لە هاووڵاتییان دەکرێت سەردانى بەڕێوەبەرایەتییەکانى پسوڵەى خۆراک نەکەن

راگەیاندنی بەڕێوەبەرایەتی خۆراک

فۆڕمى ئەلکترۆنى خۆراک

ماوەى حەفتەیەکە ئەپلیکەیشنى پرکردنەوەى فۆڕمى خۆراک راگیراوە و بەڕێوەبەرایەتى پسوڵەى خۆراکى هەولێریش دەڵێت: " هەتا کاراکردنەوەى ئەپەکە داوا لە هاووڵاتییان دەکەین سەردانمان نەکەن"، هاوکات بەڕێوەبەرى پسوڵەى خۆراکى سلێمانى ئاماژە بەوە دەکات: " رێژەى لە %13ى دانیشتوانى پارێزگاى سلێمانى فۆڕمى ئەلکترۆنییان پڕنەکردوەتەوە".

بەڕێوەبەرایەتی رێکخستنی پسووڵەی خۆراکی هەولێر رایگەیاند: " ئەپی پسووڵەی خۆراک راگیراوە و داواش لە هاووڵاتییان دەکەین بۆ ئەو مەبەستە سەردانمان نەکەن هەتا ئەپەکە دەکرێتەوە و هەرکاتێک مامەڵە ئاسایی بووەوە ئاگادارتان دەکەینەوە و چۆنیەتیی شێوازی کارپێکردنی بەرنامەکە دەخەینەڕوو".

ئاراس محەمەد بەڕێوەبەری پسوڵەی خۆراکی سلێمانی، بە وێبسایتی رەسمی یەکێتیی نیشتمانیی کوردستان PUKMEDIA ی راگەیاند: " ماوەى هەفتەیەکە ئەپلیکەیشنى پڕکردنەوەى فۆڕمى ئەلکترۆنى خۆراک وەستاوە و رێژەى لە %13ى هاووڵاتییانى سلێمانى فۆڕمەکەیان پڕنەکردوەتەوە".

 لە رۆژی 7ی5ی 2023وە بە مەبەستی گۆڕینی پسوڵەی خۆراک لە کاغەزەوە بۆ ئەلکترۆنی، مامەڵەی پسوڵەی خۆراك راگیراوە و نە منداڵى تازە لەدایکبوو بۆ فۆڕمى خۆراک زیاد دەکرێت و نەبڕینی بەشەخۆراکی مردووش ئەنجام دەدرێت.

ئەمەش لەکاتێکدایە، رۆژی 3ی حوزەیرانى 2025، پڕۆسەی بە ئەلکترۆنیکردنی فۆرمی خۆراکی هاووڵاتیان لە هەرێمی کوردستان دەستیپێکردووە، بڕ‌‌‌یاربوو رۆژی 5ی 7ی 2025 كۆتا واده‌ی پڕ‌‌كردنه‌وه‌ی فۆڕ‌‌‌مە ئه‌لكترۆنییەکە بێت، به‌ڵام واده‌كه‌ی چەندجارێک درێژکرایەوە لە پێناوى ئەوەى دەرفەتى زیاتر بدرێت بە هاووڵاتییان بۆ ئەوەى فۆڕمەکە پڕبکەنەوە.

پەیوەست بە قۆناغی داهاتووی فۆڕمی ئەلکترۆنی، ئاراس محەمەد به‌ڕ‌‌ێوه‌به‌ری پسوڵه‌ی خۆراكی سلێمانی، لە رابردوو بە PUKMEDIA ى راگەیاندبوو: " له‌ قۆناغی دووه‌مدا خزمه‌تگوزاری پڕ‌كردنه‌وه‌ی فۆڕ‌م و زیادكردن و كه‌مكردنه‌وه‌ی ئه‌ندامانی خێزان به‌ بڕ‌ێك پاره‌ ئه‌نجامده‌درێت و بێبه‌رامبه‌ر نامێنێت، بەشێوەیەک بۆ هه‌ریه‌كێك له‌خزمه‌تگوزارییه‌كان بڕ‌ی 10بۆ 11هه‌زار وه‌رده‌گیرێت".

PUKMEDIA