دوای 22 ساڵ سوپای عیراق دۆڵی حۆرانی کۆنترۆڵکردەوە

PUKMEDIA

سوپای عیراق

دوای 22 ساڵ بۆ یەکەمجار سوپای عیراق دۆڵی حۆرانی لە پارێزگای ئەنبار لەسەر سنووری عیراق – سعودیە بە تەواوەتی کۆنترۆڵکرد.

تەحسین خەفاجی بەڕێوەبەری راگەیاندنی وەزارەتی بەرگریی عیراق رایگەیاند: دۆڵی حۆران بە تەواوەتی لەلایەن هێزەکانیانەوە کۆنترۆڵکراوە و هیچ مەترسییەک لەو ناوچەیەدا نییە و دۆخەکە سەقامگیرە.

بەوتەی خەفاجی، هێزەکانی سوپای عیراق هێڵێکی بەرگرییان لە دۆڵی حۆران دروستکردووە، کە رێگری دەکات لە هەموو جموجوڵێکی "تیرۆریستان" لەو ناوچەیەوە بە ئاڕاستەی شارەکان.

دۆڵی حۆران رووبەرەکەی 369 کیلۆمەترە و دەکەوێتە نزیک سنوورەکانی عیراق لەگەڵ سعودیە، لە پاش ساڵی 2003ـەوە  مۆڵگەی گرووپە چەکدارەکان بووە، هێزە عیراقییەکان نەیاندەتوانی ئەو ناوچەیە بە تەواوەتی کۆنترۆڵ بکەن و بە یەکێک لە مەترسیدارترین ناوچەکانی عیراق دادەنرا لەڕوویی ئەمنییەوە.

لە دۆڵی حۆران رووبەڕوبوونەوەی زۆر لەنێوان هێزە عیراقییەکان و گرووپە چەکدارەکاندا روویداوە و زیانی زۆر بەر هیزە عیراقییەکان کەوتووە.

PUKMEDIA