قوباد تاڵەبانی: ئاشتی و لێكتێگەیشتن چارەسەری ریشەیی كێشەكانن

راگەیاندنی قوباد تاڵەبانی

كۆبوونەوەی قوباد تاڵەبانی لەگەڵ وەفدێكی وەزارەتی دەرەوەی توركیا

قوباد تاڵەبانی، جێگری سەرۆكوەزیران پێشوازیكرد لە باڵیۆز عەلی رەزا گوینەی، بەڕێوەبەری گشتیی كاروباری عیراق و ئێران لە وەزارەتی دەرەوەی توركیا و پێكەوە لەبارەی پڕۆسەی ئاشتی و چەند پرسێكی دیكە گفتوگۆیان كرد.

لە كۆبوونەوەكەدا كە رۆژی سێ شەممە 2ی 9ی 2025، بە ئامادەبوونی ئەرمان تۆپچو، كونسوڵی گشتیی توركیا لە هەرێم بەڕێوەچوو، جێگری سەرۆكوەزیران جەختی كردەوە لەسەر پشتگیری هەرێمی كوردستان لە پرۆسەی ئاشتی لە توركیا و رایگەیاند سەركەوتنی ئەم پڕۆسەیە لە بەرژەوەندی هەموو ناوچەكەیدایە و هەڵگری ئەو پەیامەیە بۆ هەموو ناوچەكە كە دواجار چارەسەری راستەقینە و ریشەیی كێشەكان هەر لە رێگەی ئاشتی و لێكتێگەیشتنەوە بەدی دێت نەك لە رێی شەڕ و ئاڵۆزی و ناسەقامگیرییەوە.

لە تەوەرێكی دیكەی كۆبوونەوەكەدا باسی پەیوەندییەكانی نێوان هەرێم و بەغدا كرا. لەمبارەیەشەوە قوباد تاڵەبانی روونیكردەوە كە گفتوگۆی بەردەوام هەیە بۆ ئەوەی بەپێی دەستور كێشە و ناكۆكییەكان چارەسەر بكرێن. وتیشی: لە ئێستادا زیاتر لە هەر كاتێكی دیكە لێكتێگەیشتن هەیە بۆ چارەسەركردنی كێشەكان بە تایبەتیش كێشەی مووچە و هەناردەكردنەوی نەوتی هەرێم.

PUKMEDIA