سەرۆک بافڵ: هەر هەنگاوێک لەخزمەتی خەڵکدا بێت یەکێتی پشتیوانی دەکات

راگەیاندنی سەرۆكی یەكێتیی نیشتمانیی كوردستان

پێشوازی سەرۆك بافڵ لە موحسین مەندەلاوی، جێگری یەكەمی سەرۆكی ئەنجوومەنی نوێنەران

بافڵ جەلال تاڵەبانی، سەرۆكی یەكێتیی نیشتمانیی كوردستان لە دەباشان پێشوازی لە موحسین مەندەلاوی، جێگری یەكەمی سەرۆكی ئەنجوومەنی نوێنەرانی عیراق كرد. 

موحسین مەندەلاوی پیرۆزبایی لە بافڵ جەلال تاڵەبانی كرد بەبۆنەی هەڵبژاردنی بە سەرۆكی هاوپەیمانیی سۆسیال دیموكرات لە جیهانی عەرەبی. هەروەها لە دیدارەكەدا جەخت لە پەرەپێدانی پەیوەندی نێوان هەردوولا كرایەوە بۆ كاركردنی پێكەوەیی و یەكخستنی هەوڵەكان بۆ چارەسەركردنی كێشەكان و بەردەوامی هەماهەنگی نێوان سەرجەم لایەنە سیاسییەكان لەپێناو پاراستنی سەقامگیریی وڵات. 

تاوتوێكردنی دۆخی سیاسیی عیراق و كێشەی مووچەی مووچەخۆرانی هەرێمی كوردستان تەوەرێكی دیكەی گفتوگۆكان بوو، هەردوولا لەسەر پابەندبوون بە رێككەوتنی نێوان هەرێمی كوردستان و بەغدا هاوڕابوون.  

سەرۆك بافڵ رایگەیاند، هەر هەنگاو و پرۆژەیەك لە خزمەتی خەڵكە خۆشەویستەكەماندا بێت، یەكێتی لەگەڵیدا دەبێت و بە پێكەوەیی و هاوبەشی دەتوانین بەسەر ئاڵنگارییەكاندا زاڵبین. 

جێگری یەكەمی سەرۆكی ئەنجوومەنی نوێنەرانی عیراق پشتگیریی بۆ سەرخستنی هەموو ئەو هەوڵ و هەنگاوانە دەربڕی كە بۆ چەسپاندنی یاسا و پاراستنی ئاسایش و ئارامی هاونیشتمانییان لە سلێمانی دەدرێن.

PUKMEDIA