قوباد تاڵەبانی: سلێمانی وەک شاری ئازادی دەمێنێتەوە

نوسینگەی رۆژنامەوانی قوباد تاڵەبانی

قوباد تاڵەبانی و محەمەد ئەلحەسان

قوباد تاڵەبانی جێگری سەرۆکوەزیران لەگەڵ محەمەد ئەلحەسان نوێنه‌رى تايبه‌تى سكرتێرى گشتیی نەتەوەیەكگرتووەكان له‌ عیراق کۆبووەوە و پێکەوە لەبارەی دواین پێشهاتەکانی هەرێمی کوردستان و عیراق گفتوگۆیان کرد.

لە کۆبوونەوەکەدا کە رۆژی دووشەمە(1/9/2025)  بەڕێوەچوو، جێگری سەرۆکوەزیران باسی لە پێویستیی سەروەری یاسا و رێزگرتن لە دامەزراوەکان کرد و رایگەیاند ئەوەی لە ماوەی رابردوودا لە سلێمانی روویدا لە درێژەی هەوڵەکانی چەسپاندنی سەروەری یاسا و جێبەجێکردنی بڕیاری دادگا و پاراستنی ئارامی و ئاسایشدا بووە.

قوباد تاڵەبانی راشیگەیاند: وەک چۆن سلێمانی هەمیشە بە شاری ئازادی کاری سیاسی و ئازادی رادەربڕین لە کوردستان و عیراق و ناوچەکەدا ناسراوە، لە ئێستا و لە داهاتووشدا هەر وەک شاری ئازادییەکان دەمێنێتەوە، بەڵام لە هەمان کاتیشدا رێگە بە دروستبوون و جموجوڵی میلیشیا و هێزی چەکدار لە دەرەوەی یاسا نادرێت.

سەبارەت بە دەستگیرکراوانی رووداوەکانی ئەم دوایە، قوباد تاڵەبانی جەختی کردەوە بەپێی یاسا مامەڵەیان لەگەڵدا دەکرێت و وەک هەر تۆمەتبارێکی دیکە مافە یاساییەکانیان پارێزراو دەبێت.

PUKMEDIA