تووشبوویه‌كی دیكه‌ تای خوێنبه‌ربوون له‌دهۆك ده‌ستنیشانكرا

PUKMEDIA

وه‌زاره‌تی ته‌ندروستی حكومه‌تی هه‌رێمی كوردستان

وه‌زاره‌تی ته‌ندروستی حكومه‌تی هه‌رێمی كوردستان رایگه‌یاند: حاڵه‌تێكی دیكه‌ به‌نه‌خۆشی تای خوێنبه‌ربوون له‌هه‌رێمی كوردستان تۆماركرا، ئه‌ویش پیاوێكی دانشتووی شاری سیمێل، ته‌مه‌ن (43) ساڵانە کە پیشه‌ی قه‌سابە، به‌ركه‌وته‌ی ئاژه‌ڵی تووشبوو بووه‌، دوای سه‌ردانی نه‌خۆشخانه‌ و گومانلێكردن به‌ نه‌خۆشی تای خوێنبه‌ربوون و بوونی نیشانه‌كانی، چه‌ندین ڕ‌ێكاری ده‌ستنیشانكردن و چاره‌سه‌ری پزیشكی گیراوه‌ته‌به‌ر، له‌ئێستادا له‌ژێر چاودێری پزیشكی له‌نه‌خۆشخانه‌ خه‌وێندراوه‌ و چاره‌سه‌ر وه‌رده‌گرێت و تا ئێستا باری ته‌ندروستی جێگیره‌.

راشیگه‌یاندووه‌: داوا له‌ هاووڵاتیان ده‌كه‌ین و جه‌خت ده‌كه‌ینه‌وه‌ له‌سه‌ر جێبه‌جێكردنی ڕ‌ێنماییه‌كانی وه‌زاره‌تی ته‌ندروستی، له‌كاتی بوونی گومان و نیشانه‌كانی نه‌خۆشی له‌سه‌ر ئاژه‌ڵ پێویسته‌ تیمه‌كانی ڤێترنه‌ری ئاگاداربكه‌نه‌وه‌.

هەر لەڕاگەیەندراوەکەدا ئه‌وه‌شحراوه‌ته‌ڕوو، تائێستا دوای بوونی چه‌ندین حاڵه‌تی گومانلێكراوی نه‌خۆشی تای خوێنبه‌ربوون له‌ هه‌رێمی كوردستان و هاتنیان بۆ نه‌خۆشخانه‌ و به‌دواداچوون و پشكنین بۆیان له‌ماوه‌ی رابردوودا، ده‌ره‌نجام ته‌نها نۆ حاڵه‌ت ده‌سنیشانكراون و پشتڕ‌استكراوه‌ته‌وه‌ كه‌ به‌داخه‌وه‌ دوو حاڵه‌ت له‌به‌ر قورسی باری ته‌ندروستییان گیانیانله‌ده‌ستداوە و حاڵه‌ته‌كانی دیكه‌ به‌ته‌واوی چاكبوونه‌ته‌وه‌و له‌نه‌خۆشخانه‌ ده‌رچوونه.

PUKMEDIA