جێگری سەرۆکی هەرێم:تەئکید لە رەوایەتیی ماف و داواكارییەكانی گەلەكەمان دەكەینەوە

PUKMEDIA

شێخ جەعفەر شێخ مستەفا

جێگری سەرۆکی هەرێمی كوردستان لە ساڵیادی ئەنفالی بادیناندا، پەیامێک بڵاودەکاتەوە و رایدەگەیەنێت:"لەم یادە پڕ شکۆیەدا، جەخت لە رەوایەتیی ماف و داواكارییەكانی گەلەكەمان دەكەینەوە، ئومێدەوارم لە چوارچێوەی دەستوور و یاسا نێودەوڵەتییەکاندا و پاڵپشت بە کۆدەنگی نێوان لایەنە سیاسییەکانی کوردستان، فشارێکی بەهێز بخرێتە سەر کۆمەڵگەی نێودەوڵەتی بۆ بە جینۆساید ناساندنی ئەنفال و دووبارەنه‌بوونەوەی ئەنفالێکی تر".

دەقی پەیامەکە:

ئەمڕۆ 37 ساڵ تێپەڕ دەبێت بە سەر ئەنفال و جینۆسایدکردنی خەڵکی سڤیل و بێتاوانی ناوچەی بادیناندا، ئەم تاوانە دژ بە مرۆڤایەتیە درێژکراوەی ئەو زنجیرە تاوانانەبوو کە ڕژێمی بەعسی لەناوچوو لە چوارچێوەی پلان و نەخشەیەکی بۆ داڕێژراو بە مەبەستی لەناوبردنی نەتەوەی کورد، لە ساڵانی هەشتاکانی سەدەی ڕابردوودا لە ناوچە جیاجیاکانی کوردستان ئەنجامیدا و لە چەند قۆناغێکی جیاجیادا هەزارەها ڕۆحی زیندووی لە پیر و مناڵ، ئافرەت و پیاو، بێ جیاوازیی و دوور لە هەستی مرۆڤایەتی، لە بیابانەکانی باشووری عێراقدا بێ ڕەحمانە زیندەبەچاڵ و کۆمەڵکوژ کرد.

هەمیشە کێشەکانی ئێمە لەگەڵ ڕژێمە یەک لە دوای یەکەکانی عێراقدا، لەسەر خاک و نیشتیمان و شووناسی نەتەوایەتیمان بووە، بە درێژایی مێژوو ڕەوایەتییان داوە بە ئازار و ئەشکەنجەدانی گەلی کورد و هەوڵدان بۆ گۆڕینی دیمۆگرافیای نیشتیمانەکەمان، لێرەدا ئەوەی گرنگە بۆ پاراستن و بەرگریکردن لە شووناسی نەتەوەییمان پەرەپێدانی هەستی نەتەوایەتیی و بیروباوەڕێکی قووڵی نیشتیمانپەروانەیە بە گیانێکی کوردانە.

لەم یادە پڕ شکۆیەدا، جەخت لە ڕەوایەتیی ماف و داواكارییەكانی گەلەكەمان دەكەینەوە، ئومێدەوارم لە چوارچێوەی دەستوور و یاسا نێودەوڵەتییەکاندا و پاڵپشت بە کۆدەنگی نێوان لایەنە سیاسییەکانی کوردستان، فشارێکی بەهێز بخرێتە سەر کۆمەڵگەی نێودەوڵەتی بۆ بە جینۆساید ناساندنی ئەنفال و دووبارەنه‌بوونەوەی ئەنفالێکی تر.

لەم بۆنە پڕ ئازارەدا، سەری ڕێز و نەوازش بۆ گیانی پاکی شەهیدان و ئەنفالکراوانی بادینان و گشت ئەو ناوچانەی کە بەر شاڵاوی بەدناوی ئەنفال کەوتوونە دادەنەوێنم، سڵاو لە کەسوکاری شەهیدان و قوربانیانی ئەنفال و گشت شەهیدانی ڕێگای ڕزگاریخوازی کوردستان بێت، هەمیشە لەگەڵتانین و جێگای شانازین بۆ کورد و کوردستان.

شێخ جەعفەر شێخ مستەفا
جێگری سەرۆکی هەرێمی کوردستان
25ی8ی2025

PUKMEDIA