راپۆرتە سیاسییەکانی چوارەمین و پێنجەمین کۆنگرەکانی یەکێتی بڵاوکرایەوە

تایبەت

دیمەنی مەراسیمەکە

لەمەراسیمێکی شایستەدا مەڵبەندی دیراساتی گشتی یەکێتیی نیشتمانیی کوردستان، راپۆرتە سیاسییەکانی چوارەمین و پێنجەمین کۆنگرەکانی یەکێتی وەک بەشێک لە ئەدەبیاتی سیاسی بڵاوکردەوە.

لەمەراسیمەکەدا، د.یوسف گۆران لێپرسراوی مەڵبەندی دیراساتی گشتی یەکێتیی نیشتمانیی کوردستان رایگەیاند:"هەر وەک چون لە هەنگاوی یەکەمدا هەرسێ راپۆرتەکەی رەوانشاد سەرۆک (مام جەلال)مان، لە دووتوێی کتێبێکی سەربەخۆدا چاپ و بڵاوکردەوە، لە چوارچێوەی گرنگیدانی مەڵبەندەکەمان  بە ئەدەبیاتی سیاسیی یەکێتی، ئەمڕۆ 11ی8ی 2025،  راپۆرتی سیاسی کۆنگرەی چوارەم کە لەلایەن هەڤاڵی تێکۆشەر کاک (کۆسرەت رەسوڵ عەلی) وەک جێگری سکرتێری گشتی پێشکەش بە ئەندامانی کۆنگرە کرا، هەروەها راپۆرتی سیاسیی کۆنگرەی پێنجەم کە لەلایەن هەڤاڵ (بافڵ جەلال تاڵەبانی) وەک سەرۆکی یەکێتیی نیشتمانیی کوردستان پێشکەش بە ئەندامانی کۆنگرە کرا، چاپ و بڵاوکردەوە".

ئاماژەی بەوەشکرد:" راپۆرتە سیاسییەکانی هەر پێنج کۆنگرەکە، بایەخ و گرنگییەکی سیاسی، ستراتیجی و مێژووییان بۆ سەرجەم هەڤاڵانمان لە هەموو ئۆرگانەکاندا هەیەو هەر یەک لە و راپۆرتانە گوزارشت و بیرکردنەوەی سەردەمی خۆیانن"،وتیشی: "ئەم هەنگاوە هەنگاوێکی مێژوویی و سیاسیی حیزبەکەمانە و لە داهاتوویەکی نزیکدا هەنگاوی تریشی بە دوا دادێت، کە لە ئیستاوە دەستمان پێکردووە".

لەکۆتای مەراسیمەکەدا هەردوو راپۆرتەکە، کە لەچوارچێوەی ئەدەبیاتی سیاسیی یەکێتیی نیشتمانیی کوردستانن بەسەر ئامادەبوواندا دابەشکران.

PUKMEDIA