ئەنجومەنی ئاسایشی نێودەوڵەتی ئیدانەی كردەوە توندوتیژییەكانی سوەیدا دەكات

ميدياكان

ئەنجومەنی ئاسایشی نێودەوڵەتی

ئەنجومەنی ئاسایشی نێودەوڵەتی بە توندی ئیدانەی ئەو كردەوە توندوتیژیانە دەكات، كە لە سوەیدا دژی خەڵكی سڤیل ئەنجامدراون و داواش لە دەسەڵاتدارانی سوریا دەكات دڵنیایی بدەن لە ئەنجامدانی لێكۆڵینەوەی باوەڕپێكراو، خێرا، شەفاف، بێلایەن بەپێی پێوەرە نێودەوڵەتییەكان و جێبەجێكردنی پڕۆسەیەكی سیاسیی گشتگیر.

ئەنجومەنی ئاسایشی نێودەوڵەتی لە راگەیەندراوێكدا بە توندی ئیدانەی ئەو كردەوە توندوتیژیانە دەكات، كە لە سوەیدا دژی خەڵكی سڤیل ئەنجامدراون كە كوشتاری بەكۆمەڵ و گیانلەدەستدانی لێكەوتوونەتەوە و بوونەتە هۆی ئاوارەبوونی نزیكەی 192 هەزار كەس لە ناوخۆدا".

لە راگەیەنراوەكەدا ئەنجومەنی ئاسایشی نێودەوڵەتی هانی هەموو لایەنەكان دەدات كە دڵنیایی بدەن لەوەی نەتەوە یەكگرتووەكان و هاوبەشەكانی دەتوانن هاوكاریی مرۆیی بگەیەننە هەموو كۆمەڵگە زیانلێكەوتووەكانی سوەیدا و سەرانسەری سوریا.

ئەنجومەنی ئاسایشی نێودەوڵەتی داوا لە دەسەڵاتدارانی سوریاش دەكات دڵنیایی بدەن لە ئەنجامدانی لێكۆڵینەوەی باوەڕپێكراو، خێرا، شەفاف، بێلایەن و گشتگیر بەپێی پێوەرە نێودەوڵەتییەكان، هاوكات داوای جێبەجێكردنی پڕۆسەیەكی سیاسیی گشتگیر دەكات، كە لەلایەن سورییەكانەوە بەڕێوەببرێت، بە پشتبەستن بە بنەما سەرەكییەكانی بڕیاری 2254.
 
PUKMEDIA