لە کۆبوونەوەیاندا سەرۆککۆمار و پارێزگارى کەرکوک پێکەوەژیانیان دووپاتکردەوە

نوسینگەى راگەیاندنی پارێزگاری کەرکوک

وێنەیەکى کۆبونەوەکە

سەرۆککۆماری عيراق د.لەتیف جەمال رەشید سەردانى کەرکوکى کرد، بە مەبەستى بەشدارى کردن لە فێستیڤاڵى "کەرکوک هێمای پێکەوەژیانە"، هەروەها لەگەڵ پارێزگارى کەرکوک و ژمارەیەک لە بەرپرسانى باڵاى شارەکە کۆبوەوە.

 لە راگەیەنراوێکى پارێزگاری کەرکوکدا ئاماژەبەوەدرا: "د.لەتیف جەمال رەشید سەرۆککۆمارى عیراق، گەیشتە باڵەخانەی پارێزگای کەرکوک، بە یاوەریی ئەحمەد فەکاک بەدرانی وەزیری رۆشنبیری و گەشتوگوزار و شوێنەوار، لە لایەن رێبوار تەها پارێزگاری کەرکوک و د.یاوز حەمید جێگری یەکەمی پارێزگار و فەرماندەی ئۆپەراسیۆنەکانی کەرکوک و ژمارەیەک لە ئەندامانی ئەنجومەنی پارێزگا و یاریدەدەران و راوێژکاران و بەڕێوەبەری بەشەکان لە پێشوازیاندابوون".

ئەوەشخراوەتەڕوو: "لە دیدارێکدا دۆخی ئەمنی و خزمەتگوزاری و ئابووری و هەوڵەکانی ئیدارەی کەرکوک بۆ چەسپاندنی بنەماکانی ئاشتی و پێکەوەژیانیان تاوتوێکراوە".

هاوکات لە راگەیەنراوێکى سەرۆککۆمارى عیراقیشدا ئاماژەبەوەدرا: "لەو دیدارەدا سەرۆککۆمار جەختیکردەوە لە گرنگی پێشخستنی خزمەتگوزاری و پڕۆژەکانی گەشەکردن و بەرزکردنەوەی ئاستی ژیانی هاووڵاتیان و دابینکردنی پێداویستیی بۆیان".

ئەوەش روونکراوەتەوە: "سەرۆککۆمار ئاماژەی بەوەدا کە پارێزگای کەرکوک نموونەیەکی زیندووە بۆ پێکەوەژیانی ئاشتیانە و فرەچەشنی کۆمەڵایەتی، بۆیە پێویست بەوە دەکات کە ببێتە مۆدێلێک بۆ سەقامگیری و گەشەپێدان و بنیاتنانەوە و گەشەکردن، هەروەها  ستایشی قوربانیدانی خەڵکی کەرکوکی کرد و ویستیان بۆ رووبەڕووبوونەوەی ئاستەنگەکان و پاراستنی پێکەوەژیانی ئاشتیانە و چاندنی بەهاکانی برایەتی و هاوپشتی و هاریکاری".

ئەمەش لە کاتێکدا لە راگەیەنراوەکەى پارێزگارى کەرکوکیشدا ئەوەباسکراوە: "پارێزگاری کەرکوک جەختی لە پەرۆشی ئیدارە و تیمە حکومییەکەی کردەوە بۆ خزمەتکردنی هاوڵاتیان و چەسپاندنی بنەماکانی پێکەوەژیان و گرنگیدان بە کەرکوک کە خاوەنی سامانێکی زۆر و وزەی گەنجە".


PUKMEDIA