تیكتۆك 16 ملیۆن ڤیدیۆ ده‌سڕێته‌وه‌و هه‌رێمی كوردستانیشی گرتووه‌ته‌وه‌

Ohio University

تیکتۆک

سه‌رچاوه‌ میدیاییه‌كان ئاماژه‌ به‌وه‌ ده‌كه‌ن، كه‌ كۆمپانیای تیكتۆك 16 ملیۆن و 500 هه‌زار ڤیدیۆیان له‌تۆڕ‌ی كۆمه‌ڵایه‌تی تیكتۆك له‌نیشتمانی عه‌ره‌بی و ده‌وڵه‌تانی تری رۆژهه‌ڵاتی ناوه‌ڕ‌است به‌هۆی پابه‌ندنه‌بوون به‌ بنه‌ما و ستانداره‌كانی كۆمپانیاكه‌ سڕ‌یوه‌ته‌وه‌و توێژه‌ران و مامۆستایانی زانكۆش ده‌ڵێن:" به‌شێك له‌و ڤیدیۆیانه‌ش له‌لایه‌ن به‌كاربه‌رانی هه‌رێمی كوردستانه‌وه‌ به‌رهه‌مهێنراون و كوردستانیش یه‌كێك له‌و ناوچانه‌یه‌ كه‌ به‌هۆی خراپ به‌كارهێنانی ئه‌و تۆڕ‌ه‌وه‌ جگه‌ له‌نیگه‌رانی داواكاری گشتی و رێكخراوه‌كان و رایگشتی، ده‌زگای ئاسایش-یش به‌شێكی زۆری له‌و تیكتۆكچیانه‌ ده‌ستگیركردووه‌".

سه‌رچاوه‌یه‌ك له‌ده‌زگای ئاسایش به‌ وێبسایتی ره‌سمیی یه‌كێتیی نیشتمانیی كوردستان PUKMEDIA ی راگه‌یاند:" هه‌ڵمه‌تی چاودێرییكردن و سنووردانان بۆ ئه‌و كه‌سانه‌ به‌رده‌وامده‌بێت كه‌ له‌رێگه‌ی خراپ به‌كارهێنانی مۆبایله‌وه‌ تۆڕ‌ه‌ كۆمه‌ڵایه‌تییه‌كان به‌ تایبه‌ت تیكتۆك بۆ ئامانجی ناڕ‌ه‌وا به‌كارده‌هێنن و كاریگه‌ریی نه‌رێنی له‌سه‌ر كۆمه‌ڵگا به‌جێده‌هێڵن".

سه‌رچاه‌وه‌كه‌ ئاماژه‌ی به‌وه‌شكرد:" ئاسایشی كۆمه‌ڵایه‌تی بۆ ده‌زگاكانی ئاسایش هێڵی سووره‌و به‌هه‌موو جۆرێك رێگریی له‌و كه‌سانه‌ ده‌كرێت كه‌ ناوه‌ڕ‌ۆكی میدیایی خراپ و ناپه‌سه‌ند له‌ تیكتۆك بڵاوده‌كه‌نه‌وه‌".

به‌پێی راپۆرته‌كه‌ رۆژنامه‌نووسییه‌كان، ئه‌و ڤیدیۆیانه‌ی كۆمپانیای تیكتۆك ده‌یانسڕ‌ێته‌وه‌، په‌یوه‌ندیدارن به‌ سه‌رپێچیكردن له‌ رێكاره‌كانی بڵاوكردنه‌وه‌و په‌یوه‌ندیان به‌ تیرۆر و لادانه‌ كۆمه‌ڵایه‌تییه‌كان و بڵاوكردنه‌وه‌ی توندوتیژی و هاندانی خه‌ڵك بۆ سه‌ركێشیكردن به‌ژیانییه‌وه‌ هه‌یه‌و ساڵانه‌ به‌هۆی ئه‌و جۆره‌ ڤیدیۆیانه‌وه‌ چه‌ندین كه‌س له‌سه‌رانسه‌ری جیهان خۆیان ده‌كوژن، كه‌ بێگومان هه‌رێمی كوردستانیش له‌خراپ به‌كارهێنانی ئه‌و تۆڕ‌ه‌ كۆمه‌ڵایه‌تییه‌ له‌ ریزبه‌ندی پێشه‌وه‌یه‌و هه‌وڵه‌كانیش له‌هه‌رێمی كوردستان له‌لایه‌ن ده‌زگای ئاسایش و وه‌زاره‌تی رۆشنبیری و لایه‌نه‌ په‌یوه‌ندییداره‌كانی دیكه‌وه‌ بۆ رێگریكردن له‌بڵاونه‌بوونه‌وه‌ی ڤیدیۆی نه‌شیاو به‌رده‌وامیی هه‌یه‌.


PUKMEDIA