پەیامی ئۆجەلان بۆ خەڵکی مەخموور: لەپرۆسەی ئاشتیشدا ئێوە پایەی سەرەکین

ئەرشیف

کەمپی مەخمور

پاش ئەوەی هێزی عیراق لەچەند رۆژی رابردوودا چواردەووری کەمپی مەخمووریان گرت، ئەم کارەش کاردانەوەی ناوخۆیی و جیهانی لێکەوتەوەو لەم چوارچێوەیەشدا عەبدوڵڵا ئۆجەلان رابەری زیندانیکراوی پارتی کرێکارانی کوردستان پەیامێک ئاڕاستەی خەڵکی مەخموور دەکات و دەڵێت:" گەلی مەخموور لە بونیادنانی پرۆسەی ئاشتی و کۆمەڵگەی دیموکراتیکیشدا پایەی سەرەکی تێکۆشانمان دەبن".

دەشڵێت:"سڵاو و خۆشەویستی گەرمی خۆم بۆ هەموو گەلەکەمان دەنێرم کە لە مەخموور دەژین، گەلی مەخموورمان لە مێژووی تێکۆشانماندا رۆڵێکی گرنگیان گێڕا و جێگەیەکی گرنگیان گرت، وێڕای هەموو سەختییەکانیش بە پراکتیکییان نیشانیان دا کە بەرخۆدان ژیانە و قارەمانێتییەکی مەزنییان گێڕا و باری گرانی تێکۆشانیان بە سەرکەوتووترین شێوە لە ئەستۆ گرت، دەریانخست هەلومەرج چی دەبێت گرنگ نییە، ژیانی ئازاد لە پێش هەموو شتێکەوەیە، بوون بە خاوەن هەڵوێست و رەنجێکی شایستە بە گەلی کورد و تێکۆشانەکەی".

لەپەیامەکەیدا ئۆجەلان ئەوەشدەخاتەڕوو:" لەو باوەڕەدام، گەلی مەخموورمان وەک چۆن لە رابردوودا بووە پایەی سەرەکی تێکۆشانمان، لەم پرۆسەی بونیادنانی ئاشتی و کۆمەڵگەی دیموکراتیکەدا خاوەنی هەمان رۆڵ و ئەرکی گرنگ دەبێت، وەک هێزی دینامیکی ئەم پرۆسەیە، خۆ بە بەرپرسیار بینین و پێشەنگایەتی کردن پێویستییەکی میراتی تێکۆشانیانە، سەرنجی دیدارەکانیشمان لەسەر بارودۆخی گەلی مەخموورمانە، بێگومان بە پێشکەوتنی پرۆسەکە ئەوانیش دەگەڕێنەوە سەر خاکی خۆیان. بەڵام پێویستە بزاندرێت، کە نزیکایەتی تاکەکەسی و خانەوادەیی پێشنەکەوێت، ئێمە بابەتە کۆمەڵایەتی، سیاسیی و یاساییەکان بەشێوەیەکی کۆلێکتیڤ بگیرینە دەست و لەسەر ئەو بنەمایە بەرەو چارەسەریی هەنگاو بنێین".

خەڵکی کەمپی پەنابەرانی شەهید رۆستەم جوودی (مەخموور) بەهۆی فشارە ناخۆییەکانەوە ماوەی 31 ساڵە ئاوارەی مەخموور بوون و لە بارودۆخێکی سەختدا بەرخۆدانێکی بێهاوتا بەڕێوەدەبەن و لەئێستاشدا بەهۆی پرۆسەی ئاشتییەوە لەو وڵاتە هیوایەک هەیە بۆ گەڕانەوەیان بۆ زێدی خۆیان.

PUKMEDIA