دوو لیستی مووچه‌ بۆ به‌غدا نێردراوه‌و چاره‌نوسیشیان دیارنییه‌

PUKMEDIA

دراوی عیراقی

دوو لیستی مووچه‌ی مووچه‌خۆرانی هه‌رێمی كوردستان لای وه‌زاره‌تی دارایی عیراقه‌و تائێستا واده‌ی ناردنی مووچه‌ی هیچ مانگێكیان دیار نییه‌و حكومه‌تی هه‌رێمی كوردستانیش ئاماده‌یه‌ بڕی 120 ملیار دیناری دیكه‌ وه‌ك داهاتی نانه‌وتی هه‌رێم  ره‌وانه‌ی به‌غدا بكات.

رۆژی 25ی6ی2025 وه‌زاره‌تی دارایی حكومه‌تی هه‌رێمی كوردستان رایگه‌یاند:" كه‌ لیستی مووچه‌ی مانگی حوزه‌یرانیان ئاڕاسته‌ی وه‌زاره‌تی دارایی عیراق كردوه‌، له‌و چوارچێوه‌یه‌شدا سروه‌ محه‌مه‌د ئه‌ندامی ئه‌نجومه‌نی نوێنه‌رانی عیراق له‌فراكسیۆنی یه‌كێتیی نیشتمانیی كوردستان به‌ PUKMEDIA ی رایگه‌یاند:" وه‌زاره‌تی دارایی عیراق وردبینی لیستی مووچه‌ی مانگی شه‌شی مووچه‌ خۆرانی هه‌رێمی كوردستانی ته‌واو كردووه‌".

 ئاماژه‌ی به‌وه‌شدا:" گرنگه‌ هه‌ردوو حكومه‌ت پابه‌ندی لێكتێگه‌یشتنه‌كه‌ی نێوانیان بن و رێگه‌ نه‌درێت مووچه‌ی مووچه‌خۆرانی هه‌رێم تێكه‌ڵ به‌ ململانێ سیاسییه‌كان بكرێت".

ئه‌مه‌ش له‌كاتێكدایه‌، وه‌زاره‌تی دارایی حكومه‌تی هه‌رێمی كوردستان رۆژی 3ی8ی2025 له‌ راگه‌یه‌نراوێكيدا ئاماژه‌ی بۆ ئه‌وه‌كردوه‌:" لیستی مووچه‌ی مانگی ته‌مموزی مووچه‌خۆرانی هه‌رێمی كوردستانی ئاڕاسته‌ی وه‌زاره‌تی دارایی عیراق كردوه‌، به‌مه‌ش له‌ئێستادا لیستی دوو مووچه‌ی مووچه‌خۆرانی هه‌رێم لای عیراقه‌.

بۆ ناردنی مووچه‌ی مانگی ئایار حكومه‌تی هه‌رێمی كوردستان بڕی 120 ملیاری دیناری داهاتی نانه‌وتی بۆ حكومه‌تی عیراق نارد، ئه‌مه‌ش له‌چوارچێوه‌ی ئه‌و لێكتێگه‌یشتنه‌دا بوو كه‌ له‌نێوان هه‌ردوو حكومه‌تدا ئیمزا كرا، هاوكات به‌پێی زانیارییه‌كانی PUKMEDIA ، بۆ ناردنی مووچه‌ی مانگی شه‌ش-یش حكومه‌تی هه‌رێم ئاماده‌یه‌ بڕی 120 ملیاری دیناری دیكه‌ بۆ عیراق بنێرێت.

PUKMEDIA