نه‌بوونی رێژه‌ی یاسایی ئاماده‌بوان كۆبوونه‌وه‌ی په‌رله‌مانی په‌كخست

PUKMEDIA

ئەنجومەنى نوێنەران

بڕ‌‌یاربوو ئه‌مڕۆ شه‌ممه‌2ی8ی2025 ئه‌نجوومه‌نی نوێنه‌ران سێیه‌مین دانیشتنی خۆی بۆ ده‌نگدان و تاوتوێكردنی كۆمه‌ڵێك پڕۆژه‌یاسا ئه‌نجامبدات، به‌ڵام به‌هۆی نه‌بوونی رێژه‌ی یاسایی ئاماده‌بووان، كۆبوونه‌وه‌كه‌ ئه‌نجامنه‌درا، جێگری سه‌رۆكی په‌رله‌مانیش بڕیار ده‌دات هه‌ر په‌رله‌مانتارێك ئاماده‌ی دانیشتنه‌كه‌ نه‌بووبێت، بڕی یه‌ك ملیۆن دینار سزا بدرێت.

د.بڕیار ره‌شید ئه‌ندامی ئه‌نجومه‌نی نوێنه‌رانی عیراق له‌ فراكسیۆنی یه‌كێتی به‌ PUKMEDIA ی راگه‌یاند:"به‌هۆی نه‌بوونی رێژه‌ی یاسایی په‌رله‌مانتارانی ئاماده‌بوو، كۆبوونه‌وه‌كه‌ی ئه‌مڕۆی ئه‌نجومه‌نى نوێنه‌رانى عیراق ئه‌نجامنه‌درا".

به‌پێی زانیارییه‌كانی PUKMEDIA، لیژنه‌ی ئاسایش و به‌رگری داوایان له‌ سه‌رۆكایه‌تی ئه‌نجومه‌نه‌كه‌ كردووه‌ كه‌ پرۆژه‌یاسای حه‌شدی شه‌عبی بخاته‌ ناو دانیشتنی ئه‌مڕۆی ئه‌نجومه‌نه‌كه‌، به‌و هۆیەشه‌وه‌ ژماره‌یه‌كی زۆر ئه‌ندامی ئه‌نجومه‌نه‌كه‌ بایكۆتی دانیشتنه‌كه‌یان كرد و له‌به‌رامبه‌ریشدا موحسین مه‌نده‌لاوی، جێگری سه‌رۆكی ئه‌نجوومه‌نی نوێنه‌ران رایگه‌یاندوه‌: "هه‌ر ئه‌ندامێك له‌ دانیشتنی ئه‌مڕ‌ۆی ئه‌نجوومه‌نی نوێنه‌ران ئاماده‌نه‌بووبێت پێویسته‌ ملیۆنێك دینار له‌ مووچه‌كه‌ی ببڕدرێت".

بڕیاربوو له‌دانیشتنه‌كه‌ی ئه‌مڕۆدا ده‌نگدان بۆ پێشنیاری یاسای هه‌مواركردنه‌وه‌ی هه‌مواری دووه‌می یاسای دامه‌زراوه‌ی زیندانیانی سیاسی ژماره‌ 4ی ساڵی 2006 ئه‌نجامده‌درێت، هه‌روه‌ها ده‌نگدان له‌سه‌ر پرۆژه‌یاسای په‌سه‌ندكردنی رێككه‌وتننامه‌ی هاندان و یه‌كترپارێزی له‌ وه‌به‌رهێنانی نێوان حكومه‌تی عیراق و حكومه‌تی شانشینی سعودیه‌ ئه‌نجامبدرێت.

هه‌روه‌ها بڕیاربوو له‌دانیشتنه‌كه‌دا ده‌نگدان له‌سه‌ر یاسای پێشنیاركراوی هه‌مواركردنه‌وه‌ی یه‌كه‌می یاسای بنه‌ماكانی یه‌كسانی بڕ‌‌وانامه‌ و بڕ‌‌وانامه‌ی عه‌ره‌بی و بیانی ژماره‌ (20)ی ساڵی 2020 به‌ڕ‌ێوه‌بچێت، ده‌نگیش به‌ ره‌شنووسی یاسای ر‌‌ێكخستنی وزه‌ نوێبووه‌كان‌ ده‌درێت، له‌گه‌ڵ ئه‌وه‌شدا ده‌نگدان له‌سه‌ر پڕۆژه‌یاسای ئازادی راده‌ربڕ‌‌ین و گردبوونه‌وه‌ و خۆپیشاندانی ئاشتیانه‌ بدرێت".

له‌گه‌ڵ ئه‌وه‌شدا بڕیاربوو خوێندنه‌وه‌ی یه‌كه‌م بۆ پڕۆژه‌یاسای زانكۆی عیراق بۆ زانسته‌ ئه‌منییه‌كان و خوێندنه‌وه‌ی دووه‌م بۆ پڕۆژه‌یاسای هه‌مواری یه‌كه‌می یاسای به‌رگری شارستانی ژماره‌ (44)ی ساڵی 2013 و خوێندنه‌وه‌ی دووه‌م بۆ پڕۆژه‌یاسای رێكخستنی مافه‌كانی قوربانیانی نه‌خۆشخانه‌ی ئیبن ئه‌لخه‌تیب و قوربانیانی سه‌نته‌ری ئه‌لنه‌قا و قوربانیانی ر‌‌ووداوه‌كه‌ی حه‌مدانییه‌ بكرێت، هه‌روه‌ها خوێندنه‌وه‌ی دووه‌م بۆ یاسای پێشنیاركراوی پاراستن و باشتركردنی ژینگه‌ ئه‌نجامبدرێت.

PUKMEDIA