بڕیاردەری فراكسیۆنی یەكێتی هۆكاری نە ناردنی مووچە ئاشكرا دەكات

PUKMEDIA

كاروان یاروەیس بڕیاردەری فراكسیۆنی یەكێتی لە ئەنجومەنی نوێنەرانی عیراق

لەگەڵ ئەوەی بڕیاربوو ئەمڕۆ 23ی 7ی 2025، وەزارەتی دارایی عیراق مووچەی مانگی ئایار بۆ مووچەخۆرانی هەرێم بنێرێت، بەڵام هیچ بڕە پارەیەك بۆ دابەشكردنی مووچە نەخرایە سەر هەژماری دارایی هەرێم، بڕیاردەری فراكسیۆنی یەكێتیش هۆكارەكەی بۆ نەبوونی پارەی كاش لەبەردەست وەزارەتی دارایی عیراق دەگەڕێنێتەوە.

كاروان یاروەیس بڕیاردەری فراكسیۆنی یەكێتی لە ئەنجومەنی نوێنەرانی عیراق، بە وێبسایتی رەسمی یەكێتیی نیشتمانیی كوردستان، PUKMEDIA ی راگەیاند: "نە ناردنی مووچەی مانگی ئایار لەلایەن وەزارەتی دارایی عیراقەوە بۆ هەرێم، پەیوەندی بە نەبوونی پارەی كاشەوە هەیە لە وەزارەتی دارایی و هەوڵەكان بۆ بەدەستخستنی پارەی مووچەی مووچەخۆرانی هەرێم لەلایەن دارایی عیراقەوە بەردەوامن".

"حكومەتی عیراق نایەوێت دەستكاری لە پارەی دیاریكراوی مووچەی مانگی حەوتی مووچەخۆرانی عیراق بۆ هەرێم بكات و كورتهێنانی لە مووچەی مووچەخۆرانی خۆی بۆ دروست ببێت، بۆیە بەناچاری ناردنی مووچەی بۆ هەرێمی كوردستان بە هۆكاری جیاواز راگرتووە" كاروان یاروەیس وادەڵێت. 

راشیگەیاند: "وەزارەتی دارایی بەنیازە ئەمڕۆ و سبەی ئەو كورتهێنانەی كە بۆ مووچەی هەرێم هەیەتی لەلایەن بانكی مەركەزییەوە پڕبكاتەوە و مووچە بۆ هەرێم بنێرێت، پاشانیش بەردەوامبێت لە دابەشكردنی مووچەی مانگی حەوتی مووچەخۆرانی".

نزیكەی 85 رۆژە مووچەخۆرانی هەرێم مووچەیان وەرنەگرتووە، هەرچەندە بڕیاربوو ئەمڕۆ وەزارەتی دارایی عیراق مووچەی مانگی ئایار بۆ مووچەخۆرانی هەرێم بنێرێت، بەڵام نەبوونی پارەی كاش لەبەردەست وەزارەتی دارایی عیراق  ناردنی مووچەی زیاتر دواخست.

PUKMEDIA