شێخ جەعفەر و كونسوڵی بەریتانیا: یەكخستنەوەی هێزی پێشمەرگە گرنگە

راگەیاندنی جێگری سەرۆكی هەرێمی كوردستان

شێخ جەعفەرو كونسوڵی بەریتانیا

ئەمڕۆ 20ی 7ی 2025، شێخ جەعفەر شێخ مستەفا، جێگری سەرۆكی هەرێمی كوردستان پێشوازی لە ئەندرۆ بیزڵی، كونسوڵی گشتیی بەریتانیا لە هەرێمی كوردستان و وەفدێكی یاوەری كرد.

لە كۆبوونەوەكەدا دوایین پێشهاتە سیاسی و ئەمنییەكانی عیراق و ناوچەكە، پەیوەندییەكانی نێوان هەولێر و بەغدا، بەڕێوەچوونی هەڵبژاردنی داهاتووی پەرلەمانی عیراق و هەماهەنگیی و برەودانی زیاتر بە پەیوەندییە دیپلۆماسییەكانی بەریتانیا و هەرێمی كوردستان، گفتوگۆیان لە بارەوە كرا.

هەر لە كۆبوونەوەكەدا، هەردوولا جەختیان لە بەردەوامبوون و فراوانكردنی پەیوەندییەكان كردەوە و هاوڕا بوون لەسەر ئەوەی كە كێشەكانی هەولێر ـ بەغدا، بە گفتوگۆ و لە چوارچێوەی دەستووردا چارەسەر بكرێن، هەروەها دووپاتیان كردەوە كە تیرۆریستانی داعش تاكو ئێستاش مەترسین بۆ سەر عیراق و ناوچەكە بەگشتی، لەمبارەیەوە كاری هاوبەش و هەماهەنگیی زیاتری نێوان هێزەكانی هاوپەیمانان و پێشمەرگە و سوپای عیراقیان بە پێویست زانی. 

لە بەشێكی دیكەی گفتووگۆكانی كۆبوونەوەكەدا، كە كۆڵۆنێڵ كریس هەیمڵ، راوێژكاری سەربازیی هێزی هاوپەیمانیی بۆ ریفۆرمی پێشمەرگە ئامادەی بوو، چاكسازییەكانی وەزارەتی پێشمەرگە و هەنگاوەكانی یەكخستنەوەی پێشمەرگە لە چوارچێوەی وەزارەتی كاروباری پێشمەرگەدا، بە گرنگییەوە باسی لێوەكرا.

PUKMEDIA