سەرۆکی فراکسیۆنی یەکێتی: سەركەوتنمان بەرھەمی یەکڕیزیمانە

PUKMEDIA

هەرێم كەمال ئاغا سەرۆكی فراكسیۆنی یەكێتی لە ئەنجومەنی نوێنەرانی عیراق

دوای کۆبوونەوەی وەفدی باڵای یەکێتی نیشتمانیی کوردستان و پارتی دیموکراتی کوردستان ، ئەنجومەنی وەزیرانی عیراق لێکتێگەیشتنی نێوانی ناوەند و هەرێمی پەسەند کرد، سەرۆکی فراکسیۆنی یەکێتیش رایدەگەیەنێت:" لە ئەنجامی یەکڕیزی کوردەوە بووە".

هەرێم کەمال ئاغا سەرۆکی فراکسیۆنی یەکێتی لە ئەنجومەنی نوێنەرانی عیراق، لە وتارێکیدا کە لە بەشی بیروڕای PUKMEDIA بڵاوکراوەتەوە، رایدەگەیەنێت:" لەدوای کۆبوونەوەی نێوان مەکتەبی سیاسی یەکێتی و پارتی بەئـامادەبوونی  هەریەك لەبەرێزان کاك مەسعود بارزانی و  کاك بافڵ تاڵەبانی دوایی لێك گەیشتن و راسپاردن ، وەفدی هاوبەش بە سەرۆكایەتی كاك بافڵ سەردانیی بۆ بەغدا و لەگەڵ فایەق زێدان سەرۆکی ئەنجومەنی باڵای دادوەری  و سەرۆكی ئەنجومەنی وەزیران  محمد شیاع سودانی ، کێشەی مووچەی مووچەخۆرانی ھەرێمی كوردستان چارەسەرکرا".


"چارەسەری مووچە دەرخەری یەکڕیزی نێوان ھێز و لایەنە سیاسیەکانی ھەرێمی کوردستانە ، یەکڕیزی و یەکگوتاری کورد لەھەموو قۆناغەکان ، کاریگەری ڕاستەوخۆی لەسەر ھێز و پێگەی کورد و نوێنەرانی کوردستان بووە و دەبێت"، هەرێم کەمال ئاغا وادەڵێت.

ھەوڵی دیپلۆماسی  سەرۆك بافڵ  پردێکی بەھێزبوو  بۆ  لێكتێگەیشتن

سەرۆکی فراکسیۆنی یەکێتی ئاماژەی بەوەشکردووە:" ھەوڵە دیپلۆماسیە بەردەوامەکانی سەرۆك بافڵ بۆ بەغدا لەڕابردوو و لە ئـێستادا ، بە سیاسەت و تێڕوانینە نوێیەکانی پردێکی بەھێزبوون  بۆ لەنزیكەوە لێكتێگەیشتن لە نێوان حکومەتی ھەرێم و ناوەندەكانی بڕیار لەبەغداد ، یەکێتیی نیشتمانیی کوردستان ھەمیشە پشت ئـەستوور بە بناغە نەگۆڕەکانی یەکڕیزی و ئـاشتی و تەبایی لەنێو خۆی ھەرێم و عیراق وگۆڕانکاریەکانی ناوچەکەدا ،گەڕانەوە بۆ سەرمێزی گفتوگۆ وچەسپاندنی دیموکراسیەتی ڕاستەقینە بە کلیلی چارەسەرکردنی ھەموو کێشەکان دەزانێت".

یەکڕیزی ببێتە ئـامانج وستراتیژێکی نوێ

هەرێم کەمال ئاغا داواشی کردووە:" وەك چۆن بە یەکڕیزی  توانرا کێشەی مووچەی مووچەخۆران چارەسەربکرێت ، پێویستە ئـەمە ببێتە ئـامانج وستراتیژێکی نوێ بۆ چارەسەرکردنی کێشە ھەڵپەسێردراوەکانی تری نێوان حکومەتی ھەرێم و حکومەتی ئیتیحادی ، بەتایبەت پرسی ناوچە کێشە لەسەرەکان وپرسی نەوت لەچوارچێوەی یاسای نەوت وگاز و داھاتەکانی نەوت و داهاتەکانی دیکە ، چونکە لێکتێگەیشتن و تەبایی ھەمیشە ھەوێنی چارەسەرکردنی کێشەکان دەبێت".

حکومەتی ھەرێم ھەوڵی  جددی  بدات  بۆ  حوکومڕانیەکی تەندروست

لە کۆتایشدا، هەرێم کەمال ئاغا سەرۆکی فراکسیۆنی یەکێتی لە ئەنجومەنی نوێنەرانی عیراق رایگەیاندووە:"پشوودرێژی خەڵکی کوردستان ، پەیوەندی  بە مێژووی پڕ سەروەری و ماڵوێرانی و قوربانیدانی ڕۆڵەکانی خۆیەتی ، بۆیە سەبرو ئارامی گرت و ڕۆژە ناخۆشەکانیشی تێپەڕاند ،  بۆیە دەبێ حکومەتی ھەرێم ھەوڵی بەپەلەو جددی تر بدات ، بۆ  ھەنگاونان بەرەو حوکومڕانیەکی تەندروست ئـیدارەدانێکی ڕاست دروست بۆ وەڵامدانەوەی داخوازییەکانی خەڵکی کوردستان و خزمەتکردنیان".

PUKMEDIA