هێرشی درۆنی کرایەسەر سێ کێڵگەی نەوتی لە زاخۆ و دهۆک

PUKMEDIA

دیمەنی هێرشەکە

دژە تیرۆری کوردستان رایدەگەێنێت: "سەرلەبەیانی ئەمڕۆ بە درۆنی بۆمبڕێژکراو هێرشکرایە سەر سێ کێڵگەی نەوتی لە سنووری زاخۆ و دهۆک".
 
ئەمڕۆ جارێکی دیکە هێرشی درۆنی کراوەتە سەر کێڵگەی نەوتی لە هەرێمی کوردستان و بەگوێرەی زانیارییە ئەمنی و میدیاییەکان، هێرشەکە سەرلەبەیانی  16ی7ی2025 بە دوو درۆنی بۆمبڕێژکراو کراوەتە سەر کێڵگەی نەوتیی DNO لە بێشخابووری سەر بە ئیدارەی سەربەخۆی زاخۆ".

دوای سەعاتێک لە رێگەی درۆنێکی بۆمبڕێژکراوەوە هێرشکرایە سەر کێڵگەی نەوتیی DNO لە تاوکێی سنووری ئیدارەی سەربەخۆی زاخۆ  و دوای چارەکێکی دیکە  لەرێگەی درۆنێکی بۆمبڕێژکراوی دیکەوە هێرشکراوەتەسەر سەر کێڵگەی نەوتی هەنت ئۆیلی ئەمریکی لە باعەدرێی قەزای شێخانی سەر بە پارێزگای دهۆک.

 لەو هێرشە درۆنیانەدا زیانی ماددی بەر کێڵگە نەوتییەکان کەوتوون و هیچ زیانیکی گیانیان نەبووە.

وەزارەتی سامانە سروشتییەکان: بە تووندی ئەم هێرشە تیرۆرستیانە ئیدانە و شەرمەزار دەکەین

سەبارەت بەو هێرشە درۆنییانەش وەزارەتی سامانە سروشتییەکان راگەیانراوێکی بڵاوکردەوە و رایگەیاند:"سەر لەبەیانی ئەمڕۆ چوارشەمە 16ی تەمووزی 2025لە ڕێگای درۆنی بۆمبرێژکراوەوە ژمارەیەک هێرشی تیرۆریستی کرایە سەر کێڵگەکانی نەوتی تاوکێ و پێشخابوور و عین سفنی لە ئیدارەی سەربەخوی زاخۆ و قەزای شێخان سەر بە پارێزگای دهوک، هەر چەندە هێرشەکان زیانی گیانی نەبووە، بەڵام زیانێکی زۆری بە ژێرخانی کێڵگەکان کەوتووە".

"وەزارەتی سامانە سروشتییەکان بە تووندی ئەم هێرشە تیرویستیانە ئیدانە و شەرمەزار دەکات، کە مەبەست لێدانی ژێرخانی ئابووری هەرێمی کوردستان و دروست کردنی مەترسییە لە سەر سەلامەتی کارمەندانی مەدەنی کەرتی وزە"، لەڕاگەیەنراوەکەدا هاتووە.

هەر لەراگەیەنراوەکەدا وەزارەتی سامانە سروشتییەکان ئاماژەی بەوەشکردووە،"وەزارەتمان بانگەوازی هەموو لایەنە پەیوەندیدارەکان لە حکومەتی فیدراڵی و کومەڵگەی نێودەوڵەتی دەکات کە بە زووترین کات بێنە سەر خەت بۆ پاراستنی گیانی کارمەندانی مەدەنی و ئەمنیەتی وزە و رێگریکردن لە هێرشی دیکە بۆ سەر کەرتی وزەی کوردستان و وەزارەتیشمان هەموو هەوڵێکی خۆی بۆ پاراستنی گیانی کارمەندانی کەرتی ووزە و پێگەی ستراتیجی خۆی لە دابینکردنی سەقامگیری ووزە لە ناوچەکە و جیهان دەدات".


PUKMEDIA