شایستە داراییەكانی بژمێرەكان لە حكومەتی عیراق وەرگیراوەو چەند رۆژی داهاتوو دابەشدەكرێت

PUKMEDIA

پڕۆسەی سەرژمێری

وەزارەتی پلاندانان رایدەگەیەنێت: "شایستە داراییەكانی بژمێرەكان لە حكومەتی عیراق وەرگیراوە و لە چەند رۆژی داهاتوودا دەستدەكرێت بە دابەشكردنیان"، راشیدەگەیەنێت: "هەرچەندە تائێستا زیاتر لە 13 ملیار دینار ماوە بۆ هەرێم بنێردرێت، سەرباری ئەوەی بڕیاری ئەنجومەنی وەزیرانی لەسەرە، بەڵام دامودەزگاكانی حكومەتی عیراق كەمتەرخەمن لە جێبەجێیكردنی".
 
لە راگەیەندراوێكی وەزارەتی پلاندانانی حكومەتی هەرێم كە كۆپییەكی دەست PUKMEDIA كەوتووە راگەیەندراوە: "لە ماوەی 7 مانگی رابردوودا و دوای هەوڵێكی زۆر و بەدواداچوونی بەردەوام لەلایەن وەزیری پلاندانانی هەرێم و بریكاری وەزارەت، توانرا  بەشی شایستەی دارایی تایبەت بە بەڕێوەبەرەكان و یاریدەدەرەكان و بژمێرەكان، لە حكومەتی عیراق وەربگیرێت".

ئەوەشخراوەتەڕوو: "رێكارە كارگێڕی و داراییەكان تەواو كراون و لەمڕۆوە بەڕێوەبەرایەتییەكانی ئاماری پارێزگاكان هەڵدەستن بە رێكخستنی كارەكانیان بۆ دابەشكردنی ئەو شایستە داراییانە لە ماوەی چەند رۆژی داهاتوودا".

وەزارەتی پلاندانان ئەوەشی خستووەتەڕوو: "جێی باسە هێشتا زیاتر لە 13 ملیار دینار ماوە بنێردرێت بۆ هەرێمی كوردستان، تایبەت بەو خەرجییانەی فەرمانبەرانی وەزارەت و دەستەی ئامار و بەڕێوەبەرایەتییەكانی سەر بە دەستە لە پارێزگاكان و ئیدارە سەربەخۆكان، سەرباری ئەوەی بڕیاری ئەنجومەنی وەزیرانی عیراقی پێ دەرچووە، بەڵام دامودەزگاكانی حكومەتی عیراق كەمتەرخەمی دەكەن لە جێبەجێیكردنی، وەزارەتی پلاندانانی هەرێم لە هەوڵی بەردەوامدا دەبێت بۆ وەرگرتنی تەواوی مافە داراییەكان كە نەدراون، تاكوو مافی فەرمانبەرانی ئامار لە هەرێم نەفەوتێت". 

PUKMEDIA