تاقیكردنەوەی پۆلی 12ی ئامادەیی كۆتاییهات

ميدياكان

تاقیكردنەوە

كۆتا تاقیكردنەوەی پۆلی 12ی ئامادەیی بەڕێوەچوو، كە 115 هەزار خوێندكار بەشدارییان تێدا كرد و لە دوو هەزار و 17 ناوەندی خوێندن تاقیكردنەوەیان ئەنجامدا.

 ئەمڕۆ 6ی 7ی 2025، تاقیكردنەوەكانی پۆلی 12ی ئامادەیی كۆتاییان پێهات و 115 هەزار و 787 خوێندكار لە هەرسێ بەشی زانستی، وێژەیی و پیشەیی بەشداری تاقیكردنەوەكانیان كرد، كە 84 هەزار و 298 خوێندكار لە بەشی زانستی و 28 هەزار و 865 خوێندكار لە بەشی وێژەیی و  دوو هەزار و 624 خوێندكار لە بەشی پیشەیی بوون، هەروەها  لە دوو هەزار و 17 ناوەندی خوێندن تاقیكردنەوە ئەنجامدرا.

رۆژی 1ی 6ی 2025، تاقیكردنەوە گشتییەكانی پۆلی 12 ی ئامادەیی (زانستی- وێژەیی- پیشەیی) خوێندنگە حكومی و ناحكومییەكان، خولی یەكەم  بۆ ساڵی خوێندنی (2025/2024) دەستیپێكرد.

جێی ئاماژەیە، شەوی 13ی 6ی 2025، وەزارەتی پەروەردەی حكومەتی هەرێم، بەهۆی جەنگی نێوان ئیسرائیل و ئێران و ناسەقامگیری دۆخی ناوچەكە، لە رۆژی 14ی 6ی 2025 وە هەموو تاقیكردنەوەكانی لە قوتابخانە حكومی و ناحكومییەكان و قوتابخانە ناحكومییە نێودەوڵەتییەكان و تاقیكردنەوەكانی وەزاری پۆلی 12 ی ئامادەیی بەهەموو بەشەكانییەوە و تاقیكردنەوەكانی خولی دووەمی قوتابخانە حكومی و ناحكومییەكانیشی دواخست، دواتر رۆژی 22ی 6ی 2025، بەبڕیاری وەزارەتی پەروەردە تاقیكردنەوەكان دەستیان پێكردەوە.

PUKMEDIA