سبه‌ینێ گه‌نم له‌جوتیارانی چوار قه‌زای سلێمانی وه‌رده‌گیرێت

PUKMEDIA

گەنمی جووتیاران

سایلۆی سلێمانی ئاگاداری جوتیارانی قه‌ره‌داغ، بازیان، شارباژێڕ‌ و ماوه‌ت ده‌كاته‌وه‌، كه‌ سبه‌ینێ گه‌نمه‌كانیان راده‌ستی سایلۆ بكه‌ن.

سایلۆی سلێمانی ئاگاداری جوتیارانی قه‌ره‌داغ، بازیان، شارباژێڕ‌ و ماوه‌ت ده‌كاته‌وه‌، كه‌ سبه‌ینێ یه‌كشه‌ممه‌ 6ی7ی2025  گه‌نمه‌كانیان راده‌ستی سایلۆكان بكه‌ن.

رۆژی 10ی6ی2025، وه‌رگرتنی گه‌نمی جوتیاران له‌پارێزگاكانی هه‌رێمی كوردستان ده‌ستیپێكرد و دیلان غه‌فور ئه‌ندامی ئه‌نجومه‌نی نوێنه‌رانی عیراق له‌ فراكسیۆنی یه‌كێتی له‌كاتی ده‌ستپێكردنی وه‌رگرتنی گه‌نم له‌ سایلۆی پیره‌مه‌گرون بۆ كه‌ناڵه‌كانی راگه‌یاندن، ئاماژه‌ی به‌وه‌كرد: "بۆ هه‌ر تۆنێك حكومه‌تی عیراق 850 هه‌زار دیناری دیاریكردووه‌، بڕ‌یاریشه‌ 400 هه‌زار تۆن گه‌نم بۆ ئه‌مساڵ له‌جوتیارانی هه‌رێم وه‌ربگیرێت، هاوكات به‌هۆی شوێنه‌ جوگرافییه‌كه‌یه‌وه‌ پارێزگای سلێمانی گرنگی زۆری هه‌یه‌ له‌سه‌ر ئابوری عیراق و گه‌نمێكی زۆری تێدا به‌رهه‌مده‌هێنرێت".

هاوكات بێگه‌رد تاڵه‌بانی وه‌زیری كشتوكاڵی حكومه‌تی هه‌رێمی كوردستان، له‌كۆنگره‌یه‌كی رۆژنامه‌وانیدا رۆژی 12ی5ی2025 رایگه‌یاند:"حكومه‌تی عیراق بڕ‌یاریداوه‌ بۆ ئه‌مساڵ 6 ملیۆن تۆن گه‌نم له‌سه‌رتاسه‌ری عیراق له‌جوتیاران وه‌ربگرێت، له‌كاتێكدا ساڵی رابردوو 8 ملیۆن تۆنی وه‌رگرتووه‌".

راشیگه‌یاند:"ساڵی رابردوو 700 هه‌زار تۆن گه‌نم له‌جوتیارانی هه‌رێمی كوردستان وه‌رگیراوه‌، له‌كاتێكدا ئه‌مساڵ 400 هه‌زار تۆن وه‌رده‌گیرێت و بڕ‌ه‌كه‌ی 300 هه‌زار تۆن كه‌میكردووه‌، هه‌وڵه‌كانیشمان به‌رده‌وامه‌ بۆ ئه‌وه‌ی عیراق ساڵانه‌ بڕ‌ێكی زیاتر گه‌نم له‌جوتیاران وه‌ربگرێت".

په‌یوه‌ست به‌ كه‌مبوونه‌وه‌ی گه‌نم-یش غه‌ریب ئه‌حمه‌د ئه‌ندامی لیژنه‌ی كشتوكاڵ، له‌ فراكسیۆنی یه‌كێتی له‌ئه‌نجوومه‌نی نوێنه‌رانی عیراق، له‌ رابردوودا به‌ وێبسایتی ره‌سمیی یه‌كێتیی نیشتمانیی كوردستان PUKMEDIA ی راگه‌یاند:"ئه‌مساڵ به‌هۆی كه‌شوهه‌وا و كه‌مبوونه‌ی ئاو، به‌شێوه‌یه‌كی گشتی له‌عیراق رێژه‌ی به‌رهه‌مهێنانی گه‌نم كه‌مبووه‌ته‌وه‌، هه‌ربۆیه‌ عیراق بڕ‌یاریداوه‌ رێژه‌یه‌كی كه‌متر گه‌نم له‌سه‌رجه‌م پارێزگاكانی عیراق وه‌ربگرێت، كه‌ ئه‌مه‌ش به‌ڕ‌ێككه‌وتن و چه‌ند جارێك گفتوگۆ له‌گه‌ڵ وه‌زاره‌تی كشتوكاڵی هه‌رێم كراوه‌".

PUKMEDIA