عیراق بەشی سێیەمی پارەی گەنمی جووتیاران خەرج دەكات

PUKMEDIA

گەنمی جووتیاران

ئەمڕۆ 25ی6ی2025، وەزارەتی دارایی عیراق، بڕی 500 ملیار دیناری وەك بەشی سێیەمی شایستە داراییەكانی گەنمی جووتیاران خەرج كرد.

لە راگەیەندراوێكدا كە كۆپییەكی دەست PUKMEDIA كەوتووە، وەزارەتی دارایی عیراق رايگەیاندووە: "بڕی 500 ملیار دینار وەك بەشی سێیەمی شایستە داراییەكانی بەروبوومی گەنمی جووتیاران بۆ ساڵی 2025 خەرج كراوە و ئەم رێكارەش لە چوارچێوەی پابەندبوونی وەزارەتی داراییدایە بۆ پاڵپشتیكردنی كەرتی كشتوكاڵ و دابینكردنی نەختینەیی و سەقامگیری بارودۆخی دارایی جووتیاران و هاندان بۆ بەردەوامبوونیان".

لە راگەیەندراوەكەدا ئەوەش خراوەتەڕوو: "ئەو بڕە پارەیە بەپێی رێكارە داراییە پەسندكراوەكان خەرج دەكرێت بۆ ئەوەی راستەوخۆ بەسەر جووتیاراندا دابەشبكرێت، هاوكات وەزارەت بەردەوامە لە هەماهەنگی لەگەڵ لایەنە پەیوەندیدارەكان بۆ بەدواداچوونی رێكارەكانی خەرجكردنی پارەی جووتیاران".

رۆژی 26ی ئايار، وەزارەتی دارایی بەشی یەكەمی شایستە داراییەكانی گەنمی جووتیارانی خەرجكرد، رۆژی 12ی6ی2025 یش وەزارەتەكە بەشی دووەمی شایستە داراییەكانی گەنمی جووتیارانی بە بڕ‌ی 500 ملیار دینار خەرج كرد، هاوكات رۆژی 10ی حوزەیرانی 2025 بەبازاڕكردنی گەنمی هەرێمی كوردستان دەستیپێكرد و سایلۆكان بە بڕی 850 هەزار دینار بۆ هەر تۆنێك گەنم، گەنمیان لە جووتیاران وەرگرتووە و بڕیارە بۆ ئەمساڵ وەزارەتەكە 400 هەزار تۆن گەنم لە جووتیارانی هەرێمی كوردستان وەربگرێت.

هاوكات وەزارەتی بازرگانی و پیشەسازی حكومەتی هەرێمی كوردستان رایگەیاندووە: "تاوەكو ئێستا 147 هەزار و 247 تۆن و 975 كیلۆ گەنم لە جوتیارانی هەرێمی كوردستان وەرگیراوە، لەو رێژەیەش 38 هەزار و حەوت تۆن و 485 كیلۆ لە هەولێر، 59 هەزار و 526 تۆن و 10 كیلۆ گەنم لە سلێمانی، 49 هەزار و 714 تۆن 480 كیلۆ گەنم لە جوتیارانی دهۆك وەرگیراوە".

PUKMEDIA