ئەمڕۆ یەكەم گەشتی ئاسمانی لە هەرێم دەستپێدەكاتەوە

ميدياكان

فڕۆكەخانەی نێودەوڵەتی هەولێر

ئەمڕۆ یەكەمین گەشتی ئاسمانی لە فڕۆكەخانەی نێودەوڵەتی هەولێرەوە دەستپێدەكاتەوە، كە ماوەی 12 رۆژ بەهۆی شەڕی نێوان ئیسرائیل و ئێرانەوە و راگیرابوو.

حكومەتی هەرێم لەڕێی فەرمانگەی میدیا و زانیارییەوە رایگەیاند: "سەعات3:00ی دوانیوەڕۆی ئەمڕۆ 24/6/2025 یەكەم گەشتی ئاسمانی لە فڕۆكەخانەی نیودەوڵەتی هەولێرەوە دەستپێدەكاتەوە".

 دیلان رەشاد وتەبێژی وەزارەتی گواستنەوە و گەیاندنی حكومەتی هەرێمی كوردستان لە راگەندراوێكی كورتدا رایگەیاند: "دوای داخستنی ئاسمانی عیراق بەهۆی جەنگی نێوان ئیسرائیل و ئێرانەوە، لەماوەی 12 رۆژی رابردوودا زیاتر هەزار و 283  گەشتی ئاسمانی هەڵوەشاونەتەوە".

بەگوێرەی راگەیەندراوەكە، "لە فڕ‌ۆكەخانەی نێودەوڵەتی هەولێر هەزار و 184 گەشتی چوون و هاتن هەڵوەشاونەتەوە و لە فڕ‌ۆكەخانەی نێودەوڵەتی سلێمانیش 99 گەشتی چوون و هاتن هەڵوەشاونەتەوە".

عیراق ئاسمانی وڵاتەكەی بە رووی فڕۆكەوانیدا كردەوە و وتەبێژی وەزارەتی گواستنەوەی عیراقیش رایدەگەیەنێت: "گەشتەكانی عیراق بەتەواوی دەستیپێكردەوە".

ئەمڕۆ 24ی6ی2025، مەیسام ئەلسافی وتەبێژی وەزارەتی گواستنەوەی عیراق  رایگەیاند: "ئاسمانی عیراق بەڕووی هاتووچۆی ئاسمانیدا  دووبارە كرایەوە".

 راشیگەیاند: "لە ئێستادا گەشتە ئاسمانییەكانی عیراق و هەرێم لەتەواوی فڕۆكەخانەكان دەستیپێكردووەتەوە".

PUKMEDIA