کۆمسیۆن بۆ کۆتا جار وادەی پێشکەشکردنی داواکاری کاندیدبوون درێژدەکاتەوە

PUKMEDIA

پرۆسەی دەنگدان

ئەنجومەنی کۆمسیارانی کۆمسیۆنی باڵای سەربەخۆی هەڵبژاردنەکان بڕیاریدا، وادەی پێشکەشکردنی داواکاری کاندیدان بۆ هەڵبژاردنی ئەنجومەنی نوێنەرانی عیراق، تا 26ی حوزەیران درێژبکرێتەوە، وتەبێژی كۆمسیۆنی باڵای سەربەخۆی هەڵبژاردنەكانی عیراق-یش رایدەگەیەنێت:" چیتر وادەکە درێژ ناکرێتەوە".

جومانە غەلای وتەبێژی كۆمسیۆنی باڵای سەربەخۆی هەڵبژاردنەكانی عیراق بە وێبسایتی رەسمی یەكێتیی نیشتمانیی كوردستان PUKMEDIA  ی راگەیاند: "ئەمڕۆ 23ی6ی2025، ئەنجومەنی کۆمسیارانی کۆمسیۆنی باڵای سەربەخۆی هەڵبژاردنەکان بڕیاریدا وادەی پێشکەشکردنی داواکاری کاندیدان بۆ هەڵبژاردنی ئەنجومەنی نوێنەرانی عیراق، تا 26ی حوزەیران درێژبکاتەوە".


"پێشتر ئەنجومەنی کۆمسیارانی کۆمسیۆنی باڵای سەربەخۆی هەڵبژاردنەکان  ماوەی مانگێکی بۆ  کاندیدان، کە بە مەبەستی بەشداریکردن لەهەڵبژاردنی ئەنجومەنی نوێنەرانی عیراق-دا، فۆڕمیان وەرگرتبوو دیاریکرد بۆ گەڕانەوەی فۆڕمەکانیان، ئەمڕۆش بۆ کۆتا جار وادەکەی تا 26ی ئەم مانگە درێژکردەوە"،جومانە غەلای وایوت. 

ئەمەش لەکاتێکدایە، بەپێی زانیارییەکانی PUKMEDIA تا ئێستا 343 حزب مۆڵەتیان پێدراوە و 60 حزب لە دامەزراندندان و 118 حزبی دیكە خوازیاری بەشداریكردنن لە هەڵبژاردندا، هاوکات ژمارەی هاوپەیمانێتییەكانی پێشوو 66 هاوپەیمانێتین و لەلایەن ئەنجومەنی كۆمسیارانیشەوە پێنج هاوپەیمانێتی پەسندكراون و 11 هاوپەیمانێتی دیكەش چاوەڕێی پەسندكردنن، هاوكات 25 هاوپەیمانێتیش خوازیاری بەشداریکردنن لە هەڵبژاردندا.

ئه‌نجومه‌نی وه‌زیرانی عیراق، رۆژی 9ی4ی2025 له‌ كۆبوونه‌وه‌ی ئاسایی خۆیدا، رۆژی 11ی11ی2025ی وه‌ك رۆژی ئه‌نجامدانی هه‌ڵبژاردنی ئه‌نجومه‌نی نوێنه‌ران دیاریكرد.


PUKMEDIA